أحمد فهمي: فيلم بنات العم فكرته في البداية كانت تتناول تحول أحمد عز لـ هنيدي
تحدث الفنان أحمد فهمي، عن العلاقة التي كانت تجمعه بالفنان الراحل محمود الجندي، كما كشف أمرا جديدا بخصوص فيلم بنات العم، الذي عرض في عام 2012.
وقال أحمد فهمي خلال ندوته بالقاهرة 24: أستاذ محمود الجندي كنت بحبه جدا وهو عنده خبرات في كل حاجة في الدنيا، فكنت ساعات لما يكون عندي أي سؤال له علاقة بالحياة أو الدين كنت بروحله، لأنه دايما عنده حلول لأنه مر بحاجات كتير.
وتابع: أستاذ محمود كان وشه حلو عليا على طول، لأنه افتتح أفلام الحرب العالمية التالتة وسمير وشهير وبهير وكلب بلدي، بمشاهد له، والتلاتة نجحوا جدا، وهو من أنضف الناس اللي قابلتها.
كما تطرق فهمي للحديث عن سرقة الأفكار التي يتعرض لها العديد من المؤلفين، وقال: مرة كان في فيلم أنا وكريم بنكتب قصته، ولقيته بيقولي فاكر الفيلم ده، قصته معمولة مسلسل بيتعرض دلوقتي، قولتله ممكن يكون توارد أفكار، بس طلع إن الشخص ده كان معانا في الورشة وسمع القصة مننا.
واختتم فهمي حديثه، كاشفا أن قصة فيلم بنات العم في الأساسا مستوحاة من الفنان صلاح عبد الله، حيث قال: فكرة فيلم بنات العم كانت في الأصل بتاعة أستاذ صلاح عبد الله، بس كان قايلها أحلى، كانت الفكرة إن أحمد عز هيكون أول عشر دقايق في الفيلم موديل ولعيب سلة، وأمه هتدعي عليه فـ هيتحول لـ محمد هنيدي، وكانت فكرة حلوة جدا، وكان وائل عبد الله اللي هينتجه بس لما المشروع اتعطل رجعت لأستاذ صلاح وعرضت عليه فكرة إن يكون بنات يناموا ويصحوا ولاد، وعملنا الفيلم.
فيلم بنات العم
وعرض فيلم بنات العم عام 2012، وهو من بطولة الفنان أحمد فهمي، شيكو، هشام ماجد، صلاح عبد الله، أيتن عامر، يسرا اللوزي، وآخرين.
