محمد فهيم: الساعة مع وحيد حامد بخبرة 10 سنين حياة.. وسأقدم مشاريع عن أكثر من شخصية عامة
تحدث الفنان محمد فهيم، عن تعاونه مع السيناريست الراحل وحيد حامد في مسلسل الجماعة 2، حيث حقق نجاح كبير من خلال شخصية سيد قطب.
وقال محمد فهيم خلال حواره مع القاهرة 24: أستاذ وحيد حامد الله يرحمه كان شخص عظيم واتعلمت منه كتير، والساعة معاه بخبرات 10 سنين، وأنا قعدت معاه وقت طويل وهو كان صبور أوي عليا لأني مبتحرجش أسأل ولا اقترح، إحنا داخلين نعمل عمل فني وأنا هبقى قدام الكاميرا أو قدام الجمهور على المسرح لازم متكسفش إني أسأل علشان أعرف أمثل وأوصل الفكرة.
وتابع: بتبقى فكرة للأستاذ وحيد حامد هتخرج من خلال رؤية مخرج عن طريقي، فلازم أنا أسأل كتير وأطلع المعلومة بشكل سليم، وهو كان صبور أوي، وأنا مين جنب وحيد حامد علشان يستحمل كل الأسئلة دي ويفضل صابر عليا، ده راجل عظيم.
وعن تجسيده عدد من الشخصيات الحقيقية خلال مشواره الفني، وآخرهم شارلي شابلن، علق محمد فهيم قائلًا: الموضوع مش بس إني بقدم شخصيات حقيقة، ولكن الفكرة في الأفكار اللي عايز أقدمها للناس وهقدمها عن طريق مين هل في شخصية حقيقية عملت كده نقدمها كنموذج؟ ولا تتكتب حاجة من وحي خيال المؤلف ونقدمها للناس، وفي شخصيات كتير عايز أقدمها.
آخر أعمال محمد فهيم
وعلى جانب آخر، شارك الفنان محمد فيهم في الماراثون الرمضاني من خلال مسلسل عملة نادرة، وحقق نجاحا كبيرا منذ بداية عرضه خلال شهر رمضان.
وضم مسلسل عملة نادرة، عددا كبيرا من النجوم، أبرزهم: نيللي كريم، أحمد عيد، مريم الخشت، جمال سليمان، فريدة سيف النصر، وعدد آخر من الفنانين، والعمل من تأليف مدحت العدل وإخراج ماندو العدل.
