محمد محمود عبد العزيز: مفيش داعي لتقديم سيرة والدي الذاتية.. هو قدم التاريخ اللي الناس تفتكره بيه
كشف الفنان محمد محمود عبد العزيز، رأيه في تقديم السيرة الذاتية لوالده الفنان الراحل محمود عبد العزيز، في عمل فني.
وقال محمد محمود عبد العزيز، خلال ندوته في القاهرة 24: الموضوع مش أنا حابب نقدم ده ولا لأ، بس السيرة الذاتية عموما بتتعمل بعد مرور سنين كتير، وتيجي أجيال متعرفش الشخص أصلا.
وأضاف: لكن الناس لحد دلوقتي فاكرة أعمال محمود عبد العزيز بمشاهد معينة كمان، والراجل قدم للناس التاريخ اللي يفتكروه بيه، أنا مش هيكون عندي حاجة جديدة أقدمها، هل هتكلم على جوازه وطلاقه؟
وأضاف: اللي بيهم الناس في السير الذاتية وبيبقى تريند، يا إما فضايح أو كواليس شخصية حقيقية، زي السيرة الذاتية للراحل إسماعيل ياسين، تطرقوا لحياته الشخصية وتعب ومات إزاي، وكذلك الملك فاروق، جابوا كواليس بيته وأهله، ولو كنا سألنا محمود عبد العزيز عن تقديم سيرته أنا عارف إن رده كان هيكون لأ.
نصيحة محمود عبد العزيز لـ أولاده
على جانب آخر، سبق وكشف محمد محمود عبد العزيز، خلال ندوته في القاهرة 24، نصيحة والده الفنان الراحل له، وقال: أبويا نصحني أنا وكريم إننا منمثلش، وبدأنا نفهم مؤخرا سبب كلامه؛ لأن الشغلانة صعبة جدا، أنت ممكن تشتغل النهاردة وبكرة ولمدة سنين لأ.
وأضاف: ممكن فنان يقعد في البيت بإشاعة واحدة تطلع عليه، أيا كان حجم نجوميتك، زي إن حد يقول عليك إن الممثل ده مش بيحفظ ويذاكر، أو بيضرب أوردرات، وبدأت استوعب ده لما بدأت أدخل في المجال أكتر، اكتشفت إنها شغلانة مسؤولياتها كتير وملهاش أمان ولا ضمان.
