ماجد المصري: المسلسلات مش محتاجة فزلكة في الإخراج
تحدث الفنان ماجد المصري عن صناعة الدراما مؤكدًا أن الجمهور أصبح لا يهتم بالكادرات الإخراجية، ولكنه يهتم فقط بقصة العمل وأحداثه.
وقال ماجد المصري خلال ندوته في القاهرة 24: الجميل في الدراما بتاعنا إننا نحكي الموضوع صح، والمسلسلات دلوقتي مش محتاجة فزلكة في الإخراج، المسألة احكي واعمل الحبكة بتاعتك مضبوط علشان الناس تستمتع؛ لأن الناس بعد الحلقة بيتكلموا في القصة والأحداث والدراما، يعني مطلوب من المخرج يحكي الدراما صح وببساطة، الجمهور مش بيتناقش في الكادرات.
وتابع ماجد المصري: أستاذنا العظيم شريف عرفة لما بيعمل فيلم كوميدي في 3 ثواني بيفهم الجمهور الموضوع، والأستاذ العظيم وحيد حامد والعظيم أحمد زكي عملوا مشهد في فيلم أضحك الصورة تطلع حلوة بـ 10 أفلام، أنا عيطت في الفيلم ده على كل كلمة لأستاذ وحيد حامد.
ماجد المصري: ضرب نار مسلسل الشارع
كما تحدث الفنان ماجد المصري، عن نجاح مسلسل ضرب نار الذي يشارك فيه بجانب الفنان أحمد العوضي وياسمين عبد العزيز والذي عرض في الموسم الرمضاني 2023، قائلًا: إحنا في حتة مظبوطة ورقم واحد الحمد لله.
وأضاف: ضرب نار مسلسل الشارع وإحنا في اتجاه وجعفر العمدة في اتجاه تاني، وإحنا عندنا قصة حب جعفر العمدة مفيهوش قصة حب ولكن قدم حاجات تانية مهمة لذلك فيه تنوع جدًا في المسلسلين الاتنين شعبيين ولكن بيناقشوا أشياء مختلفة، والمستفيد الأول والأخير هو الجمهور.
