محمد فهيم: قرأت كتب سيد قطب كلها قبل سيناريو الجماعة 2.. وأذهب لطبيب نفسي للخروج من الشخصيات
تحدث الفنان محمد فهيم، عن شخصية سيد قطب التي قدمها في مسلسل الجماعة 2، والذي عُرض عام 2017 وحقق نجاحًا كبيرًا لدى الجمهور.
وقال محمد فهيم خلال حواره مع القاهرة 24: فضل كبير ونعمة من ربنا إنه دايمًا بيمنحني أدوار مش بتتكتب في الدراما عمومًا زي شخصية سيد قطب ممكن تتكتب كل 50 سنة مرة، وشارلي شابلن أول مرة تتعمل بالشكل ده، والحمد لله إن الحاجات اللي الواحد بيلعبها الجمهور بيفتكرها.
واستكمل: دايمًا لما بدخل شغل جديد بدعي ربنا بالتوفيق والنجاح والتأثير الكبير، والتأثير هو اللي هيخلي الشخصية عاشية جوا الناس، لأنها معمولة بمصداقية شديدة جدًا وهو ده المفتاح.
وتابع متحدثًا عن تأثير شخصية سيد قطب على الجمهور، قائلًا: أنا بقدم شخصية والجمهور هو اللي يحكم، الشخصية دي للأسف ليها علامات مش كويسة في تاريخنا ولها تأثير كبير على الفكر، فكنت بقول للناس اتفرجوا على الراجل ده بس خدوا بالكم هو حلو الكلمة لكن بيديكم في حتة مش كويسة، أنا قرأت الكتب بتاعته قبل ما أقرأ سيناريو وحيد حامد، والمؤلف الكبير الراحل دايمًا بيكتب الحقيقة علشان كده هو قريب من الناس.
محمد فهيم: بروح لدكتور نفسي للخروج من الشخصيات
وأضاف محمد فهيم، أنه يلجأ للطبيب النفسي ليساعده على الخروج من الشخصيات التي يجسدها، موضحًا: الشخصية أثرت عليا نفسيًا وكل شخصية بعملها بتاخد معايا وقت علشان أخرج منها، وكل شخصية بتاخد حتة مني ولازم دكتور نفسي يعالجني.
