إسلام إبراهيم: مصطفى درويش ساعدني في شغلي وكان بينسقلي المواعيد عشان مسلسل ميروحش مني
أعرب الفنان إسلام إبراهيم عن صدمته الكبيرة وحزنه الشديد لفقدان صديقه الفنان مصطفى درويش، الذي رحل عن عالمنا صباح اليوم الاثنين بعد إصابته بأزمة قلبية مفاجأة.
وقال إسلام إبراهيم، في مداخلة هاتفية في برنامج مساء dmc: وفاة الفنان الراحل مصطفى درويش صدمة كبيرة جدًا الواحد مش عارف يقول إيه.. حاسس إن حق مصطفى علينا إننا نقول قد إيه كان طيب وشهم وجدع وبيقف في ضهر أي حد ومواقف كتير بتجمعنا بيه وعشرة لأننا الحمد لله كنا مع بعض في نجاحات.
وروى إسلام إبراهيم موقفًا للراحل مصطفى درويش، قائلًا: مواقف كتير مش هنسهاله الصراحة.. حب الناس هو ده اللي بيفضل.. مش مهم البني آدم يكون مشهور على قد ما يكون محبوب، طوب الأرض كان بيحب مصطفى.. أنا مش هنسى وقت محنة شريف دسوقي.. هو أكتر حد كان في ضهره وبيجري عليه ويطمن عليه وإنه في مكان صحي.. بعلاقاته.. كان حبيب كل الناس.. كان يقدر يعمل حاجات إحنا منقدرش عليها.
وتابع: أنا شخصيًا حصلي موقف ومصطفى كان قريب مني وناخد آراء بعض.. جالي بطولة مع الجميلة دنيا سمير غانم بعد مسلسل بـ 100 وش على بشهور.. أنا كنت متأثر لأن المسلسل كان هيروح مني عشان كان فيه تضارب في المواعيد، فحكيت لمصطفى بحكم إنه صديقي.. كان بيحاول ويسعى ويقابل المخرجين ويقابل ناس وينسقلي المواعيد ونحل مشكلة الراكور ونكلم ناس معارفه.. وكأن الدور كان بتاعه.
واختتم إسلام إبراهيم حديثه عن الراحل مصطفى درويش، قائلًا: يارب في ميزان حسناته.. وصدمة كبيرة وأنا مش مصدق.. أنا مبعرفش اتكلم في الظروف زي دي.. بس أول مرة أحس إن من حقه علينا اتكلم عن سيرته الطيبة.
جنازة مصطفى درويش
وعلى جانب آخر، حرص عدد كبير من الفنانين على توديع الفنان مصطفى درويش، وحضور جنازته وتشييع جثمانه إلى مثواه الأخير، من بينهم: الفنان آسر ياسين وشريف سلامة ودياب ومحمود حافظ ومحمد علي رزق وريهام عبد الغفور وحسن أبو الروس.
