وفاء مكي بعد تراجع ميار الببلاوي عن تصريحاتها: فيلم هندي وهطلبها للشهادة في المحكمة
علقت الفنانة وفاء مكي، على تراجع الإعلامية ميار الببلاوي عن تصريحاتها الأخيرة التي أشارت فيها ببراءتها، في قضية تعذيب الخادمتين.
وقالت وفاء مكي، خلال لقائها مع القاهرة 24: ميار الببلاوي تراجعت عن تصريحاتها لأن تقريبا حد قالها الدنيا خربت عليكي فهي دلوقتي بتغير رأيها.
وأردفت وفاء مكي: هي كتمت شهادة حق، ولما طلعت اتكلمت عن الموضوع تعرضت لهجوم، والناس قالت إزاي تكتم شهادة حق، دلوقتي طالعة بتنفي، اللي بيحصل ده فيلم هندي وأنا مش قده.
استكملت وفاء مكي حديثها قائلة: ميار ضيعت من عمري 23 سنة ومش هييجي قد اللي راح، براحتها وأنا اللي هقاضيها، هي اعترفت بإرادتها.
وواصلت وفاء مكي حديثها قائلة: أنا اتخرب بيتي والحمد الله أنها طلعت قالت كلمة حق لأنه ده كرم من عند ربنا ونصر من الله، وهقاضيها وأطلبها للشهادة في المحكمة، وهطلب كمان شهادة هند عاكف.
حقيقة براءة وفاء مكي في قضية الخادمتين
وكانت ميار الببلاوي تراجعت عن تصريحاتها الأخيرة، التي أشارت فيها لبراءة الفنانة وفاء مكي، في قضية تعذيب الخادمتين، حيث أكدت ميار أن وفاء مكي كاذبة، وأنها من عذّبت الخادمتين، متعجبة من دفاع الأخيرة عن نفسها حول براءتها.
وكتبت ميار الببلاوي منشورًا، عبر حسابها الشخصي بموقع التواصل الاجتماعي فيس بوك، جاء فيه: اللهم لك الحمد ربنا أظهر الحقيقة من شاهد عيان، وكده أنا كنت بأنب ضميري على الفاضي.
أضافت ميار الببلاوي: سؤال إيه اللى بتعمليه ده يا وفاء، أنا قلت إن في موقف حصل لكن كده اتحسمت كفاية بقى، ملقتيش حد تدوسى عليه غيري وتمثلي البراءة، أو علشان أنا مش بتاجر بالموضوع ورافضة أتهم بأني بجري ورا تريند، وأفضل ألف معاكم على القنوات والمواقع بالشكل المستفز دا.
استكملت ميار الببلاوي: أنا قلت شكوكي وموقف حصل، الحمد لله إنه كان ولا هيقدم ولا يأخر، سؤال فين دليل براءتك دا؟، أنا قلت للناس إنه حصل كذا فقط، واللي حصل دا ملوش أي قيمة خالص بعد شهادة الشاهد دا، وبعد ماقرأت التحقيقات والتقارير قد إيه أنا كنت هبلة.
