بحرية مسلسل تحت الوصاية: تعايشنا مع الصيادين خلال أحداث العمل.. وكنا حريصين على أداء اللهجة الدمياطية بشكل صحيح
تحدث الفنان أحمد عبد الحميد وعلي صبحي، أصحاب شخصيتي البحرية شنهابي وعيد في مسلسل تحت الوصاية بطولة منى زكي، عن تفاصيل تحضيرات شخصيات البحرية في العمل.
وقال علي صبحي صاحب شخصية عيد خلال أحداث مسلسل تحت الوصاية، في ندوة تكريمهما في القاهرة 24، عن تحضرات العمل، قائلًا: عملنا بروفات ترابيزة، وعشنا شوية حلوين مع الصيادين، وطول وقت التصوير الصياديين الرئيسيين كانوا معانا، وهما ناس ظريفة جدًا ومخلصين جدًا في شغلانتهم وكمان في أمانتهم في نقل المعلومات، وده جزء كبير من نجاح العمل.
وأضاف الفنان أحمد عبد الحميد صاحب شخصية شنهابي: أنا فكرة الصيد كانت غريبة بالنسبة ليا، ومكنش عندي معلومات إزاي العملية دي بتتم، بالنسبة ليا أن الناس بتطلع معاها صنارة في زورق في كليبات مصر الجميلة، وفي المسلسل كنا يعتبر شغالين في مصنع للأسماك وسفينة حقيقية واسمها كمان غريب، والصيادين عندهم مصطلحات خاصة بيهم.
وأردف قائلا: كان فرصة حلوة أوي نتعايش مع العالم الرائع ده، وكنا مع الصيادين من قبل بداية التصوير لغاية ما خلصنا تصوير جميع مشاهد مسلسل تحت الوصاية.
بحارة مسلسل تحت الوصاية: كنا حريصين على تأدية اللهجة الدمياطية بشكل صحيح
أما عن كيفية إتقانهم اللهجة الدمياطية خلال أحداث مسلسل تحت الوصاية، فعلق أحمد عبد الحميد قائلًا: كان في مُصحح لهجة موجود ولكن الحقيقة أن اللهجة الدمياطي سهلة وأول ما قعدنا مع ناس من هناك لقطنا اللهجة.
وعلق الفنان علي صبحي، قائلًا: في حاجة لازم نذكرها أن كل الناس اللي في المسلسل كانت حريصة أن اللهجة تطلع صح وميكونش فيها تريقة، وإحنا كلنا بنعتز بدمياط هي مدينة ساحرة ومنتجة، وقصة اللهجة دي المخرج محمد شاكر خضير كان حريص جدًا إنها تطلع زي ما بنشوفها والجمهور ميشوفش حاجة مش مقبولة، ودي حاجة بالنسبة ليا تعلي من قدر محمد شاكر خضير عندي لأن قد إيه هو شخص مركز في إن الحاجة اللي بتعملها دي ماتئذيش حد.
