خالد الفايد يعلن حل أزمته مع هاني محروس بعد تهديده بالحبس: هرجع مصر وهسجل القرآن بصوتي
أعلن نجم ذا فويس خالد الفايد، حل أزمته مع المنتج هاني محروس، بعد تصاعد الخلاف بينهما واتهام الفايد له بتهديده بسبب اعتزاله الغناء بعد إمضائه عقدًا بشرط جزائي، وهو ما جعله يسافر خارج مصر خوفًا من التهديدات بالحبس في حال عدم سداد قيمة الشرط الجزائي.
وكتب خالد الفايد في منشور عبر حسابه بموقع فيس بوك: الموضوع بيني وبين أستاذ هاني محروس اتحل، وإن شاء الله مفيش أي حاجة، وشكرا جدا للأستاذ هاني إنه تفهّم الوضع وقال مفيش حاجة خلاص ومش هعمل أي حاجة، وربنا يقدم الخير، وإن شاء الله أكون في مصر خلال أيام.
وأضاف خالد الفايد: وشكرًا بجد إن صوتي وصل للمسؤولين، ولقينا حل مع الأستاذ هاني محروس، وحصل خير يا شباب، وأنا خلاص همسح البوستات اللي فاتت.
وأردف الفايد: ادعوا لي ربنا يثبتني على طريق الحق، وإن شاء الله في مصر لما أنزل بيتي مفتوح لأي حد من أهلي وحبايبي اللي وقفوا جمبي ودعموني، وإن شاء الله أسجل القرآن الكريم كامل بصوتي قريبا وأنزله عندي، الحمد لله رب العالمين، والله بحبكم في الله ويشهد الله علي ما في قلبي من محبة ليكم.
وكان خالد الفايد كشف تفاصيل أزمته مع المنتج هاني محروس، مشيرًا إلى أنه سافر خارج مصر خوفًا من تهديداته له بعد اعتزاله الغناء كونه كان ملتزمًا معه بعقد وشرط جزائي ولم يلتزم بالمدة المحددة بالعقد.
وخلال بث مباشر مع القاهرة 24 قال خالد الفايد: مضيت عقدًا مع الشركة التابعة للمنتج هاني محروس، وبعد اعتزالي تلقيت تهديدات من هاني محروس، بعدها بيومين مشيت من مصر لما جالي رسائل تهديد منه.
واختتم خالد الفايد: أنا في كرب علشان عاوز أعبد ربنا في سلام وصمت ومش عاوز تريند، وعاوز ربنا يوفقني أعبده في صمت وبس، ومش عارف أقرب من ربنا في بلدي مصر اللي هي بلدي الإسلامية، ومش عارف أصلي فيها من التهديدات ولا عارف أمارس عبادتي من القلق والخوف والتوتر ومش عارف أوصف لكم بمر بإيه، ولما هددني خدت بعضي ومشيت من مصر لأني مش هقدر أعيش في بلد مهدد فيها بالحبس.
