علي جمعة: السوشيال ميديا سلاح لتحطيم الشعوب والانتماء
قال الدكتور علي جمعة، عضو هيئة كبار العلماء، بالأزهر الشريف، ومفتي الجمهورية السابق، إن حياتنا تحتاج إلى ترتيب الأولويات، ضاربا مثلا لتعامله على السوشيال ميديا قائلا: عندنا أفتح تطبيق مثل الواتساب، وأستقبل عليه يوميا 450 رسالة، وأغلب هذه الرسالة (صباح الخير.. بنحبك يا مولانا.. ادعى لنا يا مولانا)، تخيل لو قرآت كل هذه الرسائل فى دقيقة لكل رسالة أو دقيقة ونصف حتى أرد عليه، حضرتك 450 على 60 دقيقة، يعنى ضيعت 7 ساعات.
السوشيال ميديا سلاح لتحطيم الشعوب والانتماء
وأضاف عضو هيئة كبار العلماء، بالأزهر الشريف، ومفتي الجمهورية السابق، خلال تصريحات تليفزيونية: إذا كنا إحنا من غير تليفون مش عارفين نخلص أشغالنا، يبقى ده على حساب الحياة، المرتبط جزء منها بأمر عضوي وهو العبادة، فبالتالى العبادة هتتأثر، يعني أنا أقوم أصلي ركعتين في جوف الليل، وأذكر الله، قبل الفجر، وأصلي الفجر، طبعا كل ده لن يكون موجودًا، ممكن أسيب بقى الوِرد بتاعي عشان أرد، لما يقولي السلام عليكم لازم أرد عليه هو الدين علمنا كده، طيب أعمل إيه أرد عليه ولا أشوف شغلي وأقرأ أورادي.
وأردف الشيخ علي جمعة: فإذا دخلنا ولقينا المحتوى ليس مفيدًا واحد بيتكلم في لغو وبيحكي أكل إيه وعمل إيه، وهذا منهيٌ عنه، والدرجة الثانية شخص بيتكلم في موضوع هو نفسه مش فاهمه، (لَا تَقْفُ مَا لَيْسَ لَكَ بِهِ عِلْمٌ ۚ إِنَّ السَّمْعَ وَالْبَصَرَ وَالْفُؤَادَ كُلُّ أُولَٰئِكَ كَانَ عَنْهُ مَسْئُولًا)، هو هنا زاد من عمق اللغو وقلة الاهتمام، الدرجة الثالثة إنه يشتم ويسب يبقى هنا دخلنا في إثم آخر من العدوان على الناس، والدرجة الرابعة إنه يكذب ويفتري ويؤلف ويعمل ابتزاز بمجموعة من الأفلام والصور، ويبقى هنا دخلنا فى جريمة أخلاقية للغاية، يبقى هنا حياة الإنسان أصبحت مسطحة وتافهة، فالدين أساسه عاوز يعمق العقلية، إذا السوشيال ميديا كأداة ومحتوى وكسلاح لتحطيم الشعوب والانتماء، وهذا يؤدى إلى التدهور لا التطور.
