في ذكرى وفاته الأولى.. حيلة سمير صبري للتعرف على العندليب عبد الحليم حافظ
تحل اليوم الذكرى الأولى لوفاة الفنان سمير صبري، الذي أفزع الكثيرين برحيله، وكان خبر وفاته صدمة لمحبيه، حيث ترك لجمهوره الكثير من الأعمال المؤثرة في مشواره الفني، كما أنه كان لافتًا النظر إليه بثقافته وعلمه، حيث توفي في 20 مايو 2022 بعد صراع مع مرض في القلب.
سمير صبري وعبد الحليم حافظ
سمير صبري تعلق بالكثير من الفنانين في صغره، ولكنه كان محبًا لفن العندليب عبد الحليم حافظ بشكل خاص، وكان يحاول طوال الوقت التعرف عليه لأنه كان يسكن معه بنفس المبنى، وروى الراحل تفاصيل علاقته بـ عبد الحليم حافظ، وقال في لقاء سابق له: أنا كنت أرجع من المدرسة، طبعًا عبد الحليم كان عبال ما يصحى من النوم وينزل على شركته ويرجع، كان يرجع 6 ونص كده.
وأضاف سمير صبري: كنت أنا ببقى في البلكونة قاعد، بشوف عربيته وهي داخلة مدخل العمارة، فكنت أجري على المصعد أسحبه عندي في السابع، وأنزل السلم جري، عشان عبال ما هو ينزل من العربية ويتحرك ويطلع للمدخل أكون أنا وصلت، فأشوف عبد الحليم، بحبه.. فيقف عبد الحليم وأنا باصص له كده وميعبرنيش، مرة والثانية والثالثة، ولا على باله.
وكشف سمير صبري الحيلة التي استخدمها لـ لفت نظر العندليب عبد الحليم حافظ، قائلًا: عشان ألفت نظره بقى.. مرة نزلت جري وبعدين قلتله هالو هليم، قاللي يو آر إنجلش، قلتلته أمريكان، وسألني عن اسمي قلتله بيتر، سلم عليا، نزل.. ركبنا الأسانسير سوا، هو طلع الدور بتاعه، طلبت منه صورة، وهو فرحان أوي إن واحد أمريكاني بقى عارفه، فيقف عند الدور بتاعه ويدخل يجيب صورة ويكتب عليها بالعربي.. إلى بيتر حليم، فضلت سنة أستنزفه أغاني، أسطوانات صور، وأول مرة دي كان معاه مجدي العمروسي وقاله شايف يا مجدي الأجانب عارفيني كمان.
وتابع سمير صبري: جيت بقى مرة جريت لتحت وكان عبد الحليم وصل ولقيت والدي واقف معاه وقالي تعالى يا سمير.. ده أنا ابني مجنون بيك، وعبد الحليم باصص لي وساكت على أني بيتر بقى ومتكلمش، في مرة بقى شافني وأنا راجع من المدرسة قاللي بيتر بقالك سنة عاملي خواجة، قلتله بحبك وعايز أكلمك وانت معبرتنيش فعملت كده.
الجدير بالذكر أن سمير صبري، كان يعمل في بدايته مذيعًا في الإذاعة الإنجليزية، ثم اتجه إلى التمثيل والغناء، له العديد من الأفلام مع الفنان عادل إمام كفيلم البحث عن فضيحة، كما قدم الكثير من الأعمال منها: فيلم حكاية حب، النشالة والبيه، الثعابين، العمالقة، هو والنساء، عدو المرأة، الراهبة، رحلة الأيام، وقدم العديد من المسلسلات أبرزهم: هارب من الأيام، قيود من نار، الرجل الثالث، ألف ليلة وليلة، ورق التوت، كما قدم مسرحية العبيط، قطط الشوارع، يا إحنا يا هيه.
