انهيار رامز أمير بعد وفاة أنثى النسر رحمة: استحملت كتير أوي
انهار الفنان رامز أمير من البكاء لوفاة أنثى النسر التي أطلق عليها رحمة، بعد خضوعها لعملية جراحية خطيرة امتدت لثلاث ساعات متواصلة، فقدت التنفس خلالها مرتين، وحاول الطبيب استعادة تنفسها بكل الطرق الممكنة.
وسرد رامز أمير حكاية أنثى النسر رحمة، من خلال نشره مقطع فيديو عبر حسابه على فيسبوك، وعلق عليه قائلًا: حكاية رحمة.. أول وصف ربنا وصفه لنفسه في أسمائه الحسنى هو الرحمن الرحيم.. زي ميكون عاوز يعلمنا إن الرحمة بتيجي قبل أي حاجة تانية.. بس للأسف الرحمة هي أكتر معنى غاب عننا كبشر.
وقال رامز خلال الفيديو: النهارده يوم صعب أوي عليّا لأن رحمة هتعمل عملية وفيه نسبة خطورة عالية مش عارفين صحتها هتستحمل التخدير ولا لأ.. كل الدكاترة قلقانين من الموضوع ده ويارب تعدي العملية على خير والواحد عمل اللي عليه.. ربنا يكرمنا يارب وتعدي على خير.
وأردف قائلا: وبدأت أولى خطوات العملية وهو البينج والدكتور قالي هنحاول نثبت الكسر واحدة واحدة.. ومن اللحظة الأولى اللي دخلت فيها العمليات وأنا متوتر وعرفت أن في خطورة لكن اللي ربنا عايزة هيكون.. وابتدى الدكتور يشتغل على الرجل الأولى اللي مكسورة وصعوبة العملية إن الرجلين اللي مكسورين وده معناه إن العملية هتطول.. والخطورة كمان إنها تفضل متخدرة الوقت ده كله.
وأضاف رامز أمير: في اللحظة اللي كنت فرحان فيها حصل اللي كنت خايف منها نفسها وقف واحنا لسه في بداية العملية وابتدى الدكتور يعملها تنفس صناعي عشان يلحقها.. الدكتور عمل كل اللي يقدر عليه وبفضل ربنا قدرت تتنفس تاني.. وتوتري زاد لأنها لسه في بداية العملية.. وللمرة التانية رحمة بطلت تتنفس وكان فاضل الدكتور يخيط الرجل التانية.. والتنفس رجع تاني.. ولما جيه الوقت الأصعب إنها تفوق من عملية 3 ساعات.
انهيار رامز أمير
وتابع رامز أمير: لحظة الانتظار كانت صعبة جدًا.. واستجابتها كانت ضعيفة عشان تفوق.. وبعد شوية فتحت عينها وبدأت تفوق.. الفرحة اللي حسيتها في اللحظة دي استحالة أعرف أوصفها لأي بني آدم.. المفروض عدينا الجزء الأصعب.. روحت البيت وحسيت إني حققت أهم إنجاز في حياتي.. وتاني يوم بدأت أجهزلها الأكل بتاع الفترة الجاية وأكلها لازم يبقى سائل واخدتها وطلعت ع الدكتور عشان تاخد المحاليل وبعدين رجعت.
واختتم رامز حديثه، قائلًا: بس وأنا في نص الطريق حسيت إن فيه حاجة غلط.. للأسف ماتت بعد ما استحملت كتير أوي. ودفنتها في أرض التدريب بتاعت رهبة.
آخر أعمال رامز أمير
يعد مسلسل رسالة الإمام هو آخر أعمال رامز أمير الفنية، والذي نافس به في موسم دراما رمضان عن حياة الإمام محمد الشافعي مع الفنان خالد النبوي، ولعب دور رجل يدعى عمرو السكندري.
