داعية إسلامي: لو فرحت زميلتك في الشغل هتاخد ثواب
قال الدكتور أسامة قابيل، الداعية الإسلامي، إن كل إنسان يجب عليه جبر خاطر الآخرين وأن يدخل الفرحة على قلوبهم، ومساندتهم في وقت الضيق والشدة، لافتا إلى أن ما يفعله الإنسان مع أخيه الإنسان ويدخل عليه الفرح يعتبر من فضل الله عليه.
داعية إسلامي: لو فرحت زميلتك في الشغل هتاخد أجر وثواب
وأضاف الداعية الإسلامي، خلال تصريحات تليفزيونية: اجعلوا كل تصرفاتكم عبادة حتى في مهنتكم خلوها عبادة الفرح، التي لا يتوقف فيها عداد الحسنات، خلي نيتك دائما أجر وأجرة، يعنى بتأخد أجر وثواب على ما تفعله سواء أنت طبيب بتخفف عن المرضى، أو صاحب مهنة بسيطة، وكمان أنت بتكسب وتاخد فلوس تجبر بخاطر زوجتك وأولادك وكمان بتأخد ثواب على تعاملاتك مع زوجتك.
واستكمل الداعية الإسلامي: كل سيدة تفرحها هتأخد عليها أجر، يعني لو فرحت زوجتك أو خالتك أو عمتك، أو أمك هتأخد أجر وثواب، وكمان لو فرحت زميلتك في الشغل هتاخد أجر وثواب، يعني لو عندك زميلة جديدة لسه بتتعلم الشغل وأنت علمتها وفهمتها بدل ما تنكد عليها وبقت كويسة وفرحت بده هتأخد أجر وثواب، لازم نبر بعض ونحقق علاقتنا القوية بربنا، مستشهدا بحديث سيدنا النبي محمد صلى الله عليه وسلم حين قال: من فرح أنثى كان كمن بكى من خشية الله.
وعلى جانب آخر، قال الدكتور أسامة قابيل، الداعية الإسلامي، إن خير عمل يفعله الإنسان هو السير في قضاء حوائج الناس ومساعدتهم، لافتا إلى أن سيدنا النبي محمد صلى الله عليه وسلم، قال: لأن يمشي أحدكم في حاجة أخيه خير له من أن يعتكف في مسجدي هذا.
وأضاف الداعية الإسلامي، خلال تصريحات تليفزيونية: سيدنا النبي محمد صلى الله عليه وسلم، علمنا أن نساعد في قضاء حوائج الناس، لازم دائما نساعد الناس حتى ولو بكلمة طيبة، حتى لو هتقعد تسمع لصديقك أو قريبك بدل ما ينشر مشاكله على مواقع التواصل الاجتماعي، لأننا كلنا معرضين للابتلاء والهموم والإنسان ليه عمر وكل ابتلاء بينتهي، ولما بتخلص المشكلة مش بتنسى من ساعدك ووقف جنبك، تخيل أنت عاوز تزور المدينة المنورة ومسجد سيدنا النبي، وعاوز تتعبد هناك، وسيدنا النبي قالك خير من الاعتكاف في مسجدي هذا.
