رامز أمير بعد وفاة أنثى النسر: أحمد مكي ساعدني في علاجها.. ومش هسيب أي طير يتعذب
كشف الفنان رامز أمير تفاصيل إنقاذه الطير الجارح والذي توفي بعد محاولات علاجه، وتأثر الجمهور بشكل كبير بسبب حالة الانهيار التي أصابت رامز بعد خسارته للطير.
رامز أمير: أحمد مكي ساعدني في علاج أنثى النسر رحمة
وقال رامز أمير في تصريح خاص لـ القاهرة 24، إنه تواصل مع الفنان أحمد مكي لمساعدته في علاج أنثى النسر رحمة نظرًا لخبرته الكبيرة في تربية الطيور، قائلًا: رحمة هي طير جارح وأنا أنقذته من حوالي أسبوعين وحاولت أعمل اللي أقدر عليه، وتواصلت مع أحمد مكي ووصلني بالدكتور هو من أشطر الدكاترة اللي عندهم خبرة في الطيور الجارحة في مصر، ولكن صحة الطير كانت ضعيفة لأنه قعد فترة كبيرة متبهدل، إحنا كنا عارفين أن نسبة الخطورة موجودة ولكن أنا عملت اللي عليا لأني مش هسيب الطير يتعذب مكنش قادر يقف على رجليه وكان بيتألم ومكنش قدامي غير احتمال ضعيف ومينفعش أسيبها، وصعوبة الموقف إني قدامي اختيارين يا إما أحاول أعالجها يا إما أسيبها بتتعذب في حياتها.
وتابع: أنا خدت الطير من شخص ووافق أنه يديني الطير علشان أعالجه، والشخص ده خاف لما الموضوع كِبر وخاصة أن الطير مالهوش تمن ودي حاجة بتحرق الدم ليا أنا كمربي جوارح، يعني الناس لو هتطمع تطمع في طير تكسب منه حاجة لو قلبك ميت، لكن تجيب طير أنت مش كسبان منه حاجة تبهدله؟ ده مش صقر مثلًا غالي ده حاجة غلبانة طايرة في السماء خدتها بهدلتها وعذبتها بدون أي منطق، وتواصلت مع الراجل وكان محترم وقولتله إني هحاول أعمل اللي هقدر عليه لأن مفيش بني آدم طبيعي بيعمل اللي أنا عملته لأنه بيبقوا شايفين أن الطير كده كده ميت بحالته الصحية دي.
رامز أمير: عايز الناس تقلدني في إنقاذ الجوارح
وأضاف الفنان رامز أمير، أن ما يحاول أن يوصله للجمهور من خلال نشره فيديوهات الاعتناء وعلاج الطيور الجارحة، هو التشجيع على القيام بعمليات الإنقاذ، موضحًا: في حاجة بحاول أوضحها للناس أن أي راعي طير لازم يكون عنده علم كافي، لأن الطير ده متعلق في رقبته، واللي بحاول أعمله من خلال حبي للكائنات دي إن الناس لما تشوف حاجة كده تحاول تعمل عمليات إنقاذ، وربنا كارمني إني ممثل والناس بتشوفني فتقلدني في الإنقاذ.
وطالب رامز أمير، بتطبيق قوانين لمعاقبة معذبين الطيور الجارحة، قائلًا: أهم حاجة يكون الموضوع مش سوشيال ميديا ولا فيديوهات بس، ولكن يكون في قانون يتطبق، خاصة أن الجوارح لها قوانين خاصة وممنوع حيازتهم من غير رخصة لأنها مش حاجة أليفة تتربى في البيت، الموضوع نفسي أسعى فيه علشان أمنع الأذى من الأول، وأول فيديو نزلته الناس قالت أنت سايب البني آدمين وبتعالج الحيوانات؟ ولكن البشر مختليفن عن بعض ومش هغير الناس، ولكن اللي هعرف أعمله إني أثر على بعض الناس والتانيين يتبطق عليهم القانون.
