لوسي بعد إعلان عرض مسرحية الحفيد ببطلة جديدة: أنا اللي مشيت لما سمعت إهانتي وإهانة الأديان وألفاظ خارجة
علقت الفنانة لوسي على قرار استبعادها من تقديم دور البطلة في مسرحية الحفيد، وتعيين الفنانة سماء إبراهيم بديلا لها على خشبة المسرح القومي، مؤكدة أنها من ابتعدت عن العمل وذلك بعد تعرضها لـ إساءة شخصية ودينية.
وقالت لوسي في تصريحات خاصة لـ القاهرة 24، إنها لا تعلم تفاصيل ما حدث، وتنتظر المحامي الخاص بها ليخبرها آخر التطورات عن أزمة مسرحية الحفيد على خشبة المسرح القومي، موضحة: كل اللي بيحصل ده أنا معرفوش ومنتظرة المحامي يكلمني يفهمني، لأنهم لو بيعيدوا نفس الحكاية يبقى هما راضيين عن الغلط اللي بيحصل على خشبة المسرح القومي.
لوسي بعد إعلان عرض مسرحية الحفيد ببطلة جديدة
وأشارت لوسي إلى أنه إذ تم عرض العمل بنفس الممثلين والمخرج، ستعود المشاكل مرة أخرى، متابعة: مفتكرش أن وزيرة الثقافة هتوافق بالإساءة للخشبة المسرح القومي، ولمصر وللأديان وللألفاظ الخارجة اللي اتقالت على المسرح، ومعتقدش إن حد يوافق على الكلام ده، وبالنسبة لي أنا بتمنى النجاح لكل الناس ويارب تنول النجاح اللي أنا عملته على خشبة المسرح القومي، أنما هما هما نفس الأشخاص ونفس المخرج هتبقى هلومه وبيعيدوا نفس المشاكل تاني وأنا بره المشاكل دي.
لوسي تتعرض لـ إساءة دينية وشخصية في المسرح القومي
وعن إعادة تقديم دور البطولة ببطلة جديدة في مسرحية الحفيد والتي يتم عرضها على خشبة المسرح القومي، أكدت لوسي أنها أخذت القرار من نفسها ولم يتم استبعادها من أحد، موضحة: أنا واللي وقفت من المسرحية ومحدش قالي أقف خالص، وأنا مش ندمانة لأني مش موافقة أقف على خشبة المسرح القومي أسمع إهانتي وأسمع إهانة الأديان وأسمع ألفاظ خارجة، أنا مسمحش بكدا ومعالي الوزيرة مش هتسمح بالكلام ده، وفيه مدير للمسرح وهو في السعودية وأكيد فيه قرار منه أنهم يعيدوا المسرحية تاني.
وتابعت لوسي: بس النيابة الإدراية لما حققت حققت مع الموظفين، هما موظفين أنا مش موظفة، واتحقق برضو معايا وقولتهم في دليل الكاميرات بس للأسف كل حاجة اتمسحت ودا كان ضدهم مش معاهم، بس برضو أنا معرفش لسه أيه هي حيثيات الحكم.
وأكدت لوسي أنها ستوافق على تقديم أعمال أخرى على خشبة المسرح القومي، ولفتت إلى أن وقوفها على هذا المسرح يزيدها شرفًا، معلقة: أنا غيرتي على المسرح القومي هي اللي وقفتني عن مسرحية الحفيد، غيرتي على قاعة سميحة أيوب، وعلى أم المسارح المسرح القومي، هي اللي خلتني أقف وأكلم معالي الوزيرة وأقولها في أخطاء جسيمة بتحصل جوه المبنى، جسيمة بمعنى الكلمة.
وختمت حديثها قائلة: بس أنا بتمنى للناس كلها النجاح والتوفيق ومش مضايقة من حد ولا متغاظة من حد، حفاظا على اسمي واسم المسرح القومي وقدسيته وخشبته العريقة اللي حملت أساتذتنا.
