مش خايف من المنافسة.. جمال العدل يكشف حقيقة خلافه مع محمد رمضان بعد خروج عالزيرو من عيد الأضحى
علق المنتج جمال العدل، على الأنباء المنتشرة والتي تفيد بوجود خلافات بين شركة العدل جروب والفنان محمد رمضان بعد خروج عرض فيلم ع الزيرو من عيد الأضحى.
وقال المنتج جمال العدل في تصريحات لـ القاهرة 24، إن تأجيل عرض فيلم عالزيرو بطولة الفنان محمد رمضان يرجع إلى ضيق الوقت في تصوير باقي مشاهد العمل، وأشار إلى أن عودة شركة العدل جروب إلى السينما عودة مهمة، مؤكدًا عدم وجود أي خلافات مع محمد رمضان بطل الفيلم.
وتابع جمال العدل: كل الكلام اللي بيتقال أن فيه خلافات مع محمد رمضان، كلام مش صحيح خالص، كل الموضوع أننا متبقي لنا عدد من أيام التصوير تقريبا أسبوع ونص، وفاضل على العيد أقل من 20 يوم، وعودة العدل جروب للسينما المفروض إنها عودة مهمة وعزيزة.
وأضاف جمال العدل: أنا مستغرب أوي من اللي بيقول أن فيه خلافات بينا وبين محمد رمضان، ومحمد رمضان منزل الخبر على السوشيال ميديا معانا بالتنسيق، ومحمد رمضان جمهوره طول السنة وطول الوقت أكبر جمهور له في العيد.
وأردف جمال العدل: مفيش بينا وبين محمد رمضان أي مشاكل، وماضيين معه أكتر من فيلم مش فيلم واحد، وهو ابننا ومفيش مشاكل من أي نوع والراجل ملتزم التزام مفيش قبل ولا بعد كدا، زي الناس الأكثر التزامنًا.
كما أكد جمال العدل أن بعض الأفلام المقرر عرضها في موسم عيد الأضحى 2023، سيتم تأجيلها أيضًا نظرًا لضيق الوقت، وعن سحب فيلم عالزيرو من الموسم نفسه، علق جمال العدل: نفسنا على قد النجم اللي معانا واسم الشركة والبطلة اللي موجودة، فمكن نلحق نعرض في العيد بس الدعاية مش هتبقى اللازمة وعدد النسخ مش كافية والاستعجال في حاجات دي مش مطلوب.
وتابع جمال العدل: الكلام ده بنعلمه في المسلسلات عشان نلحق نعرض في رمضان، إنما الميزة في السينما أننا ممكن منلحقش الموسم ده وينزل في موسم تاني ويعجب الجمهور ويبقى عمل للتاريخ.
فيلم عالزيرو
العمل من بطولة الفنان محمد رمضان ونيللي كريم، ويشارك فيه مجموعة من الفنانين أبرزهم: إسلام إبراهيم، شريف دسوقي، شريف سلامة، جومانا مراد، خالد الصاوي، الطفل منذر مهران، والعمل من إخراج محمد جمال العدل، وتأليف مدحت العدل، وإنتاج شركة العدل جروب، وكان من المقرر عرضه في موسم عيد الأضحى ولكن تم تأجيل العرض نظرًا لضيق الوقت في تصوير باقية مشاهد العمل.
