العلم يُستر صاحبه.. حمو بيكا ينصح طلاب الثانوية العامة: لو رجع بيا الزمن كنت اتعلمت وأكلت الكُتب أكل
وجه مطرب المهرجانات حمو بيكا نصيحة إلى طلاب الثانوية العامة، قبل بدء الامتحانات غدًا، مشيرًا إلى أنه لو عاد به الزمن لكان أكمل تعليمه.
وكتب حمو بيكا عبر حسابه بموقع انستجرام: بكره تعتبر بداية الامتحانات النهائية للثانوية العامة، وأنا مش جاي أديك موعظة ولا جاي أعمل شيخ عليكم..بس أنا جاي أقول لك إنك قد أي حاجة في الدنيا، وتعرف تعمل أي حاجة طالما عندك إصرار وحلم هتوصل يعني هتوصل.
وأضاف حمو بيكا: الثانوية العامة مش نهاية الرحلة والمطاف ليكم، وإنما هي بداية الحلم الحقيقي اللي نفسك تحققه، اتعلموا العلم حلو أوي، العلم بيستر صاحبه، أنا لو رجع بيا الزمن كنت اتعلمت وأكلت الكتب اكل.. ربنا معاكم يا رب وتحققوا كل أحلامكم.
حمو بيكا حريص على توجيه نصائح للطلاب
وهذه ليست المرة الأولى التي يوجه فيها حمو بيكا نصيحة لطلاب الثانوية، ففي العام الماضي حرص على نشر رسالة لهم إذ كتب: هو أنا أه مش متعلم وأخدت (محو الأمية) بالعافية، لكن ده مش حاجة تفرح ولا تقول (عندك بيكا أهو مش متعلم بس ناجح)، صدقوني والله طعم النجاح مع العلم مختلف تماما عن طعم النجاح من غير علم، مردفًا: العلم بيفرق في كل حاجه في الدنيا، كمية معاناة بشوفها يوميًا بسبب اني مش متعلم كبيرة اوي مش بتمني حد منكم يشوفها أو يتعرض لها، العلم بيستر كتير أوي وبيخليك واعي ومتفتح في كل مجالات الحياة».
واستكمل بيكا: هو أه الشارع علمني كتير، بس مش زي المدارس والجامعات، حتى لو مش هشتغل بشهادتك، وحتى لو دخلت كلية مش بتحبها، بس يكفي إنك متعلم ومعاك شهادة تقدر تسد بيها عين الشمس، اتعلموا وخلوا بالكم من تعليمكم وشهاداتكم لأنها هتفرق كتير أوي معاكوا ومع عيالكم بعد كده، أنا آه مادخلتش مدارس ومتعلمتش، بس حابب كل اللي حواليا ناجح ومتعلم وأوعى يوم تقول أهو فلان ناجح بس مش متعلم.
