أحمد سعد: آخر تيشرت ظهرت بيه كان بـ 400 ألف جنيه
كشف الفنان أحمد سعد، أن آخر تيشرت ارتداه وظهر به للجمهور بلغ سعره حوالي 400 ألف جنيه مصري.
وقال أحمد سعد في لقاء تلفزيوني: لو لبست تيشرت وطلعت بيه في برنامج مش بلبسه تاني، وأغلى تيشرت لبسته كان آخر شميز ظهرت بيه وكان سعره 10 آلاف دولار، يعني حوالي 400 ألف جنيه.
أحمد سعد: لو غنيت غريبة الناس هقدمها أحسن من وائل جسار
من ناحية أخرى، كشف أحمد سعد حبه الشديد للفنان اللبناني وائل جسار، قائلًا: بحب أغاني وائل جسار ولو غنيت أغنية غريبة الناس هغنيها أحسن منه.
كما كشف أحمد سعد المرحلة التي يطلق عليها اسم الشدة في حياته، قائلًا: لما يكون مخي مش مساعدني أفكر بشكل مناسب، والحمد لله بقى لي سنتين ده ما حصلتش.
وعن أكثر من وقف بجانبه في حياته مؤخرًا قال أحمد سعد: أخويا عمرو سعد وسامح سعد وأخواتي كلهم ومن بره العيلة زوجتي.
أحمد سعد يرد على انتقادات إطلالته الشفافة
من ناحية أخرى، رد الفنان أحمد سعد على الانتقادات والهجوم الذي تعرض له بعد ظهوره بإطلالة شفافة في حفله بالسعودية قبل أسابيع، وقال علىهامش حضوره حفل توزيع جوائز ميدل إيست ميوزك أورد MEMA في مدينة العلمين الجديدة: بشكر كل اللي هاجمني، لأنهم شايفين إني فرد من أسرتهم وواحد منهم ومارضيوش عليا كده إني ألبس حاجة وحشة، وحسيت إني جوا كل بيت وجوا كل أسرة.
وأضاف أحمد سعد: أوعد جمهوري أني مش هظهر كده تاني، ولو في حاجة شبك هخيطها أنا على إيدي، وأنا فعلًا مش الناس اللي بتصر على الحاجات الغلط، وبطلع أقول أنا غلط طالما معجبهمش.
كما تحدث أحمد سعد على سخرية طليقته الفنانة سمية الخشاب على إطلالته الشفافة: تقول اللي هي عايزاه، وكل واحد يقول اللي هو عايزه وهما كلهم جمهوري وكلهم ناس عايزين مصلحتي.
أما عن رقصها على أغنيته قال: أكيد هي بتحب تشجعني دايمًا وأكيد بتحبلي الخير وإني أكون ناجح، وأكيد الناس مش عايزة تصطاد ليا الأخطاء، كلهم عايزنّي أبقى أحسن وبقيت بالفعل.
