بوسي: فيه ناس استغلوا أبويا وقت الأزمة وحاربوني بيه.. ومحدش قالي إنه مات
تحدثت الفنانة والمطربة بوسي عن علاقتها بوالدها، مؤكدة أنها كانت تساعده باستمرار حتى قبل وفاته، معربة عن استيائها بسبب خروج خلافهم إلى العلن.
وقالت بوسي في تصريحات تليفزيونية: علاقي بـ أبويا مش محتاجة إني أبررها ولا أوري للناس بساعده وبسأل عليه ولا لأ دي علاقة أب بـ بنته، وعادي بتحصل خلافات وزعلنا من بعض شوية، ولكن مش معنى كده إني هرميه، هو لازم إني استغل أبويا؟ ولكن في وقت من الأوقات مكنش فيه علاقة، لأني مريت بأزمة ومحدش وقف جنبي وأولهم أهلي، ومنين عايزني ابعتلك فلوس وأصرف عليك وأنا مش موجودة في القاهرة وعندي أزمة مالية، لما إنتوا متقفوش معايا في زنقتي مين اللي هيقف معايا؟
وتابعت: أبويا مكنش رجل أعمال ولا راجل مقتدر، ولكن متجيش عليا ومتجيش في وقت ما أنا مزنوقة وبمشي حالي بالعافية تقول دي مبتصرفش عليا، أنت شوفتها كده تمام ولكن متستغلش وتستغل أن الناس تطلع تتكلم عليا أو يحاربوني بيك.
وأضافت بوسي، أن هناك من استغل والدها لمحاربتها، قائلة: ناس كتير راحوا له واستغلوه وحاربوني بيه، وكلمته بعد ما سعد الصغير راحله وكنت ببعت له فلوس وكنت هروح أزوره، بس عندي شغل وارتباطات ومعرفتش أروح، ومحدش قالي إنه مات، بعدها بيومين لقيت رسائل وتليفونات قالولي أبوكي تعيشي إنتي، وساعة ما مات كنت تعبانة وكنت قافلة تليفوني، وكان عندي نزلة معوية جامدة أوي رقدتني في السرير، وكان بيتعلق ليا محاليا ومباكلش، وبعدها بيومين كلمتهم قالولي أنهم عملوا الجنازة والعزاء، وسألت هل في حد ليه عنده فلوس؟ يعني هو مديون لأي حد؟ قالولي أبوكي زي الفل وإنتي كنتي لسة بعتاله فلوس.
بوسي: ميخصش سعد الصغير روحت جنازة أبويا ولا لأ.. مطلبتش منك تدخل
ووجهت بوسي رسالة شديدة اللهجة، لـ سعد الصغير، قائلة: ميخصش سعد الصغير روحت لأبويا الجنازة ولا لأ، وأنا مبحبش حد يعمل تريند على قفايا، وهو نال جزائه، ومش هتعرف تضحك على الناس وعارفة اللي بيستعرض واللي بيدعي الخير، واللي بيعمل خير مش محتاج يصوره، اللي بيعمل خير بيعمله لله مش للاستعراض، ليه بتدخل نفسك في حاجة متخصكش؟ هتقول زميلتك؟ أنا مطلبتش منك تدخل، وأنا مش عايزة حد يتدخل لأن ده أبويا.
