ياسمين عز عن تقديمها حفل مشواري لـ محمد منير: شكرا لتركي آل الشيخ على منحي هذه الفرصة
أعربت الإعلامية ياسمين عز، عن سعادتها بتقديم حفل مشواري للنجم محمد منير في المملكة العربية السعودية قبل أيام، موجهة الشكر لرئيس الهيئة العامة للترفيه المستشار تركي آل الشيخ.
وقالت ياسمين عز في برنامجها كلام الناس عبر شاشة إم بي سي مصر: سعيدة وكلي فخر بتقديم حفل مشواري لمحمد منير وهي كانت ليلة مبهرة وساحرة من ليالي جدة وبحضور الآلاف، وكل الشكر والتقدير والامتنان لـ تركي آل الشيخ أنه منحني فرصة أكون جزء من الحفل الضخم، وشكرا أنه خرج بهذا الشكل، ومبقتش حاجة جديدة على السعودية.
ياسمين عز: أنا شخصية من الصعب إبهاري
وأضافت ياسمين عز: أنا شخصية صعب إبهاري ومع ذلك انبهرت لأن فيه حالة مش طبيعية على المسرح والحفلة مفيهاش غلطة وكل حاجة مظبوطة بالورقة والقلم، ومن الممكن تعمل حفلة حلوة إنما صعب تعمل حفلة مبهرة، وجمهور السعودية راقي ومتفاعل، وفيه حفلات تانية الجمهور مش بيكون متفاعل إنما دا جمهور مرتاح ومحب ومتفاعل وفيه حفلات جاية هتكون مبهرة أكتر وفوق الخيال لأن ممكن حد عنده إمكانيات بس معندهوش فكر، وإمكانيات مش عارف توظفها وإمكانيات مع الفكر والخيال يطلع حفلات زي دي، وبيقولوا للجمهور أحلم وهنعملك الحفلة اللي عايزها، دي حاجة مرعبة، وحلمك لما يتنفذ يكون بدون غلطات مش حفلة والسلام.
ياسمين عز: شهادتي مجروحة في هاني فرحات
وأردفت ياسمين عز مشيدة بالمايسترو هاني فرحات: شهادتي مجروحة في هاني فرحات وبحسه بيجري في المكان وبيشرف على كل شيء بنفسه ومتواضع ومحب وبيهتم بكل التفاصيل والكل مهتم بشغله ومرتاح، لأن فيه شركة قائمة وبتخليك مرتاح لأنها شركة منظمة وعظيمة زي بنش مارك رائدة، والكل حاسس أنه ملك، ومسموح تتغر بشغلك طالما حلو.
ياسمين عز تشيد بـ أحمد سعد
كما أشادت ياسمين عز بأداء أحمد سعد في حفل مشواري للكينج محمد منير قائلة: أبدع وشفته قبل الحفل كان مرتاح ودا مهم للمطرب؛ لأن فيه أمان وارتياح نفسي وبالتالي هيعمل شغل حلو ودي مش مجاملة والجمهور شاف الحفلة وكل حاجة كانت مبهرة وعظيمة ومرة ثانية كل التحية لـ هيئة الترفيه وكل الشكر والامتنان لـ تركي آل الشيخ ومش جديد عليكم أنكم بتبهرونا ومش عارفة هتبهرونا أكتر من كدا إيه.
