إبراهيم فايق: أنا مش ممثل لكن بشارك في أعمال فنية مجاملة لأصحابي
كشف الإعلامي إبراهيم فايق تفاصيل مشاركته في فيلم مستر إكس بطولة الفنان أحمد فهمي، الذي طُرح أمس بالتزامن مع حلول عيد الأضحى المبارك.
وقال إبراهيم فايق لـ القاهرة 24، على هامش حضوره العرض الخاص لـ فيلم مستر إكس: الموضوع كبر فجأة، تجربة مشاركتي في فيلم مستر إكس وفي مسلسل الكبير أوي جم ورا بعض، وكان قبلهم لي مشاركة في فيلم حامل اللقب مع هشام ماجد، ومكنش فيه تخطيط ليهم، وكلها أدوار صغيرة، وهما أصحابي، وبحبهم وبتبسط بيهم وبنجاحهم.
وأضاف إبراهيم فايق: الجيل ده كله في ضهر بعض سواء على مستوى شغلنا الإعلامي أو التمثيل، وأنا طالع بشخصيتي في فيلم مستر إكس.
إبراهيم فايق: أنا لا أجيد التمثيل
أما عن اتخاذ إبراهيم فايق الاستمرار في مجال التمثيل والحصول على أدوار بها إبراز موهبة التمثيل، أردف إبراهيم: مش هقدر أعمله أنا لا أجيد التمثيل وأنا مدرستش التمثيل ومقدرش أعمل حاجة مدرستهاش بشكل كويس، لو فيه فرص مناسبة تستوجب هعمل كده، أنا مش خايف وعمري ما هدخل خناقة التمثيل محتاجة مواهب حقيقية وناس تشتغل كويس على نفسها، كل اللي بعمله إني بطلع باسمي ودوري.
وأضاف إبراهيم فايق: بالنسبة لي رقم واحد هو الإعلام الرياضي دي أكتر حاجة بحبها وعارف كويس إني بوصل للناس فيها، لكن مجال التمثيل فيه فطاحل بتوعه أنا بتبسط بس.
واختتم إبراهيم فايق حديثه عن أغنية اختياراتي مدمرة حياتي الدعائية لفيلم مستر إكس، قائلًا: الأغنية عجبتني جدًا، يمكن عجبني إن الناس كلها بتغنيها وهما مبسوطين واختياراتهم مدمرة حياتهم.
