ألفت عمر: صعوبات الشغلانة دمها تقيل.. وعدم اكتمال أعمالي سببت لي حالة نفسية
تحدثت الفنانة ألفت عمر عن سبب تأخرها وقلة أعمالها الفنية، مؤكدة أن سبب من الأسباب كان بعض الأزمات في حياتها الشخصية، بجانب ظهور عدد من شائعات اعتزالها الفن في فترة تألقها.
وقالت ألفت عمر في تصريحات خاصة لـ القاهرة 24، عن سبب تأخرها فنيًا: كان الأول كسل مني وحياتي الشخصية كان فيها مشاكل كتير ولكن بقيت مركزة في شغلي، والدنيا كلها اتغيريت وشركات الإنتاج، وناس كتير قالوا عليا إني سافرت برا مصر ومش هرجع وناس قالوا إني سيبت الشغلانة خالص، وكان في مخرجين كتير طلبوني في الوقت ده وفكروا إني اعتزلت.. ولكن الحمد لله عملت صدى حلو ولكن علاقاتي وتواجدي في الوسط الفني مش زي الأول.
وتابعت ألفت عمر: الأزمات اللي واجهتني بقالها مدة كبيرة ويمكن عدم اكتمال بعض الأعمال اللي كنت هشتغلها واتأجلت عملت لي حالة نفسية خاصة في رمضان ده واللي قبله مكنش ليا أدوار كبيرة في الشغل.
ألفت عمر: صعوبات الشغلانة دمها تقيل
وأضافت ألفت عمر: حسيت أن أتأخر عليا فكرة الفرصة الحلوة يمكن من الضغوط بتاعت فترة الشغل والتصوير وغياب الأعمال كنت هشتغلها ومعبرتش عن حالتي النفسية بأي شكل من الأشكال، الصعوبات بتاعة الشغلانة دمها تقيل، خاصة ممكن نشوف حد بيقول هيعتزل عشان مفيش شغل وهو لسة عامل بطولة، والواحد لو فكر زي الناس دي كان زمانه ميت، ولكني الحمد لله بفكر بشكل إيجابي دلوقتي.
