وفاء عامر: لو الراجل بص بره يبقى الغلط من الست.. ومفيش راجل يتجوزني ويفكر في غيري
تحدثت الفنانة وفاء عامر، عن علاقتها بزوجها، مؤكدة أنه من الصعب أن يكون الرجل متزوجًا بها وينظر لغيرها.
وقالت وفاء عامر خلال لقائها في برنامج الستات: لو الراجل بص بره أو اتجوز على مراته يبقى الغلط عندها أصل ليه يبص بره هو ناقصه إيه جوه، والراجل اللي عنده عيلين وتلاتة وأربعة محتاجين حاجات كتير وهتلاقيه بيشتغل ورديتين مهما كان مستواه إيه، الست بقى المفروض تشتغل وردية ونص إن شالله تاكل سندوتش فول وطعمية بره البيت معاه.
وتحدثت وفاء عامر عن الغيرة قائلة: في الأول كنت أنا اللي بغير أكتر وهو واثق فيا ومش بيغير، ولكن كنت بغير لأنه لسانه حلو، ودلوقتي اتعودت على أن لسانه حلو مع كل الناس ولو قال لحد حبيبتي مش معنى كده أنها حبيبته، وممكن أغير وأنا ساكتة بس أحب أراقب علشان أشوف آخر الحكاية، لكن مش بفتش في التليفون.
مفيش راجل يتجوز وفاء عامر ويبص بره
وأضافت: هو في حد يتجوز وفاء عامر ويبص بره، أنا بعمل كل حاجة وساعات جوزي بيقول لي يا صاحبي يالا نروح نلعب طاولة بقول وماله، واتعلمت علشانه الطاولة والدومينو.
وأوضحت وفاء عامر: الحب والزواج مفيهوش كبرياء عندي، يعني أني سلمت بأنك أقوى وأنا أضعف ولكن أنا كل ما بضعف قدامك ببقى الأقوى، ولكن في ست ما تحسسش الراجل أنها محتاج له والعكس ولكن الصح هو الوسط والهانم هي اللي تعرف كل حاجة.
وكشفت وفاء عامر الشخصية الأقرب لها في الأعمال التي قدمتها قائلة: الأقرب لوفاء هلالة في جزيرة غمام هي المرأة القوية التي لا يقهرها كلمة من أحد دوني وهي تعبر عن كثير من نساء العالم العربي.
ووجهت وفاء عامر نصيحة للسيدات قائلة: ما تقولش على ست أنها بمية راجل، ولكن هي ما لقتش حد في ضهرها تعتمد عليه فاسترجلت وصرفت ووقفت على رجليها وشقيت علشان ما تحملكش تكلفة، فأنا أرفض ده لأن الأوفة أم ودنين يشلوها اتنين، أنتي ست بمية راجل في أنك تحافظي على شرفك وكينونك وعرضك وبيتك لكن ما تشليش الليلة كلها لأن أنت اللي قبلتي تتحملي المسؤولية والمفروض من أول أسبوع تعرفيه انت ليك وأنا عليا.
