حنان شوقي: أنا ارتباطي لازم يكون براجل صادق ومحترم.. واللي يخون مراته يبقى دني وسافل
تحدثت الفنانة حنان شوقي عن علاقة الزوج والزوجة، مشيرة إلى أن الزواج ميثاق غليظ ويجب أن تتكون العلاقة بين الرجل والمرأة على المودة والرحمة.
وقالت حنان شوقي لـ القاهرة 24: الزواج ميثاق غليظ فيه مودة ورحمة وأخلاق، ونسب الطلاق زادت بسبب الاستعباط بين الرجل والمرأة والعلاقات اللي مش بجد والاتنين بيضحكوا على بعض ومش قد المسؤولية، فليه نستهين بهذا الرباط المقدس.
وأضافت حنان شوقي: أساس الزواج الحب والتفاهم والرحمة والاحترام ولو الناس داخلة على نور بتحب بعض وتحترم بعض وكل واحد بيتغير علشان خاطر التاني الحياة هتستقيم، لكن العكس بيحصل وكل واحد داخل يا أنا يا هو هتبقى الحياة كارثة، ليه دلوقتي فيه حزب الستات ضد الرجالة والرجالة ضد الستات دي الكارثة الكبرى مفيش حاجة اسمها كده الرجل والمرأة واحد.
وأردفت: لو الراجل شتم الست ومد إيده عليها تبقى كارثة ومهزلة والمفروض تقف له واقفة ولو الست تجاوزت تبقى قلة أدب وعدم احترام وتربية.
الراجل اللي يخون زوجته يبقى سافل ودني
وواصلت حنان شوقي: الراجل اللي يخون زوجته يبقى قليل الأدب وسافل ودني، والمثل بيقول من أمنك لا تخونه حتى لو أنت خاين، لأن الزوج هو كل حاجة في الحياة هو أخويا وأمي وأبويا ده والزوج هو السند.
وعن رأيها في قبول الست خيانة زوجها قالت: على حسب العلاقة فيه حد بيغلط ويقول آسف على حسب الصراحة والود والصدق وده يخلي فيه تسامح، ولكن حد بيتعامل مع المرأة على إنها كرسي ويقول لها كفاية إني اتجوزتك يبقى سافل وقليل الأدب.
وأردفت: أنا ارتباطي لازم يكون براجل بجد مش دكر يعني صادق ومحترم ويحترمني أو قلته أحسن مش هعيش كذبة، مقدرش أعيش مع واحد شايفاه بيكذب لإني كده هشيل ذنبه لإني أنا مرايته ونصه التاني.
واستكملت: لو الحياة الأسرية اتظطبت كل حاجة هتتعدل، وللأسف ضاعت مننا الأخلاق واحترام الرجل للمرأة وبيتخفوا ورا كلمة حب وهو مش بيكون حب بيكون واحد أعجب بواحدة وعاوز يتجوزها وخلاص.
