كنت غبية.. عايدة غنيم نجمة الحاج متولي: افتكرت هقدم بطولات زي غادة عبد الرازق وسمية الخشاب بعد المسلسل
حلت الفنانة عايدة غنيم ضيفة على الإعلامية ياسمين عز في برنامجها كلام الناس المذاع عبر شاشة mbc مصر، وتحدثت عن كواليس مشاركتها في مسلسل الحاج متولي بعد 22 سنة من عرضه، إلى جانب حديثها عن سبب غيابها وقلة أعمالها الفنية بعد المسلسل.
وقالت عايدة غنيم عن اختيارها للمشاركة في المسلسل: عايدة رياض قالت لي إنهم بيدوروا على دور لبنت نور الشريف، وأنا كان في دماغي أنه دور محوري، وحاجة أساسية، اتفاجئت لما محمد النقلي شافني قال فيها شبه من بطة ونعمة الله، فقال تاخد دور سعدية وجه في بالي إني هكون الشغالة في البيت فزعلت وعيطت.
وأضاف: قلت لعايدة رياض أنتِ قلتيلي هعمل دور بنت نور مش دور خدامة قالتلي بصي أي حاجة في رمضان ومع نور الشريف حتى لو مشهد أطلعي وهتتشافي واتفاجئت وهما داخلين عليا بالورق لقيت الدور كبير، وبنت غادة عبد الرازق وفعلا اللي تخافي مه ما يطلعش أحسن منه.
وتحدثت عايدة غنيم عن لزمتها الشهيرة في المسلسل “مامتي”: قائلة: هي دي لزمتي، وكنت بقولها لوالدتي، واستأذنت من محمد النقلي إني أقول الكلمة دي لـ غادة عبد الرازق في المسلسل علشان لازقة في لساني، ووافق، والناس كانوا بعد المسلسل بيقوفوني في الشارع ويندهولي بالكلمة دي.
وعن كواليس المسلسل حينها قالت عايدة غنيم: غادة عبد الرازق جميلة ولطيفة، وكنا بنهزر ونضحك ونجري ورا بعض، كنا في المسلسل عيلة بجد، وبنفطر ونتسحر مع بعض، والكواليس كانت حلوة جدا وحابين بعض.
عايدة غنيم: كنت فاكرة نفسي هعمل بطولات
وكشفت عايدة غنيم سبب رفضها المشاركة في مسلسل العطار والسبع بنات، بعد مشاركتها في الحاج متولي قائلة: هو مش رفض بالمعنى ولكني مكنتش فاضية وبسافر، وكمان مكنتش حاساه دور كبير، ولكني حسبتها غلط، ومكانش فيه حد يوجهني صح، وكنت فاكره بعد الحاج متولي هعمل بطولات زي غادة عبد الرازق وسمية الخشاب وده غباء مني.
