عايدة غنيم تكشف تفاصيل مروعة عن مقتل والدتها: الحمد لله أن القاتل لم يعدم واللي حصل له عقاب أشد من الموت
كشفت الفنانة عايدة غنيم تفاصيل مروعة عن مقتل والدتها، مشيرة إلى أنها فقدت النطق 40 يومًا بعد رؤيتها وهي ملقاة على الأرض والدماء تحاوطها.
وقالت عايدة غنيم خلال لقائها في برنامج كلام الناس عبر قناة إم بي سي مصر: قعدت 40 يوم فاقدة النطق من الخضة لما شفتها وكذا حد حاول معايا أطلع في برامج وأتكلم لكني ما قدرتش.
وأضافت عايدة غنيم: وقتها كنت في المسرح بعمل بروفات وكانت عندي في بيتي ورجعت بيتها ومتعودة أكلمها أطمن عليها وأنا رايحة البروفا بتصل بيها مش بترد قلقت وقلت يمكن تعبت وكل اللي في دماغي أنها تعبانة روحت على البيت عندها وقلت أطمن عليها أرن مفيش حد بيفتح وسامعة صوت موبايلها بيرن، فخبطت على الجيران كسروا الباب.
عايدة غنيم تروي تفاصيل مقتل والدتها
وأردفت عايدة غنيم: أول ما الباب اتكسر لقيت الدنيا ضلمة كحل ولقيت نفسي اتكعبلت ولقيت دم فبقت أصرخ، ومش فاكرة حاجة بعدها غير المنظر اللي شفته، والقاتل قتلها لأن هي ست كبيرة وكان واخد ترامادول وعاوز فلوس لإنه عارف إن بنتها ممثلة وعندها فلوس.
وأضافت: استناها وهي طالعة ودخل وراها ولما حاولت تمنعه قتلها وعلشان يتأكد أنها ماتت قطع شرايين إيدها، واتقبض عليه في نفس اليوم ولما ماخدش إعدام انهارت، ولكن عرفت أن ده أكبر عقاب من ربنا لأن الموت رحمة وعرفت أن جاله انفصام في الشبكية واتعمى والدته كانت بتعدي الدائري خبطتها عربية وماتت وابنه اتولد وهو في السجن كل ده عقاب من ربنا وانتقام ربنا أشد.
