كولر بعد الهزيمة أمام بيراميدز: أجساد اللاعبين تصرخ من الإجهاد.. وعايزين إجازة ومحدش سائل فينا
تحدث المدرب السويسري مارسيل كولر، المدير الفي لفريق الأهلي، عن هزيمة فريقه أمام بيراميدز في اللقاء الذي جمع بين الفريقين على أرضية ستاد الدفاع الجوي.
وسقط الأهلي أمام نظيره بيراميدز بثلاثية نظيفة في اللقاء الذي جمع بين الفريقين في إطار لقاء مؤجل من الجولة 28 بمنافسات الدوري المصري الممتاز.
تصريحات مارسيل كولر
وقال كولر خلال المؤتمر الصحفي: كسبوا واحتفلوا احتفال كبير جدًا، لا هما خدوا مننا بطولة ولا خدوا مننا مباراة مؤثرة.
وأضاف: لعبوا أحسن مننا وكسبوا واحتفلوا احتفال كبير وده شيء كبير ليهم، ومفيش فريق في مصر أو قارة إفريقيا لعب نفس عدد ماتشات الأهلي.
وواصل: فريقنا مش قادر بدنيا أو ذهنيا والأقدام مش شيلانا بسبب ضغط المباريات، جسم اللعيبة بيصرخ من الإجهاد وعاوز إجازة ومحدش سائل فينا لحد دلوقتي.
وأردف: مش ممكن هفضل دايس على اللعيبة على طول، لازم نتعامل معاهم على إنهم بني آدمين وده متوقع جدًا اللي وصلناله، ولازم اتحاد الكرة وكل المسؤولين يفهموا أن اللعيبة محتاجة إجازات وراحة وإلا هنخسر اللعيبة على المدى البعيد.
وتابع السويسري: أنا مشفتش الواقعة بين حسين الشحات ولاعب بيراميدز ومعرفش هل حصل استفزازات من المنافس ولا لا خاصةً إن الاستفزازات كانت كبيرة جدًا طوال المباراة ولو محصلش استفزازات هيكون لنا واقفه وقرار.
وزاد: مباراة تحصيل حاصل وتجربة لعدد من اللاعبين أمام منافس قوي يعرفني مستوى اللاعب اللي بجربه ويخليني أعرف أقيمه.
وأتم السويسري: مفكرتش تماما هل مستوى الشناوي تأثر أو أي لاعب تاني بسبب العروض أو بسبب مشاكل شخصية أو أي شيء آخر.
