منى فاروق عن اعتزالها: أبوس إيديكم عاوزة أشتغل.. مش عارفة أدفع إيجار بيتي
كشفت الفنانة منى فاروق تفاصيل وأسباب اعتزالها مجال التمثيل، مشيرةً إلى أنها وصلت لمرحلة لم تستطع خلالها دفع إيجار منزلها، مطالبةً الدكتور أشرف زكي نقيب المهن التمثيلية والفنان أشرف عبد الباقي وشركات الإنتاج، مساندتها في تلك المحنة وترشيحها في أعمال فنية.
وكتبت منى فاروق عبر حسابها على انستجرام: مساء الخير الكلام اللي بقوله ده خارج خالص عن فكرة إني أخد الترند واعمل زي أي حد أنا قولت اعتزال الفن لسبب واحد هو بس هو ده مصدر رزق الوحيد اللي أنا بحبه وعاوزة اشتغله، لكن لما أوصل لمرحلة إني مش عارفة أدفع إيجار بيتي حاجة تتعب.. أنا محتاجة اشتغل عشان أعيش زي أي بني آدمة طبيعية.. أنا غلطت وربنا بيسامح.. ليه البني آدمين مش عاوزين يسامحوا.
وأضافت منى فاروق: أنا بسمع بودني لا بلاش منى عشان الفيلم والدعاية متضرش الفيلم أو المسلسل.. ليه يا ربي أنا بقيت منبوذة من كل الناس أنا مش طالبة غير اشتغل في الحاجة اللي بحبها عشان أعرف أعيش.. المجتمع حاططني في المكان الوحش بس مش يمكن عاوزة أبقى كويسة زي أي واحدة ليه بتقفلوه قدامي في كل حاجة.. عشان كده أنا بناشد الدكتور أشرف زكي والأستاذ أشرف عبد الباقي وشركات الإنتاج محتاجة الشغل.. عاوزة أعرف أعيش ولما قولت قرار اعتزال من أجل لو حد شافني بشتغلي في محل لبس أو أي شغل ميقولش إيه ده.. والله مش طالبة غير أشتغل.. أبوس إيديكم عاوزة أشتغل.
