فى قضية طبيب الساحل .. التحقيقات: المتهم حقنه بالمخدر | خاص
قررت النيابة العامة إحالة المتهمين الثلاثة الطبيب أحمد شحتة، والمحامية إيمان وثالث، بتهمة قتل طبيب الساحل الدكتور أسامة صبور عمدًا، لسرقة مبالغ مالية بحوزته، بعد دفنه حيًا داخل حفرة بعيادة المتهم الأول.
قضية طبيب الساحل الدكتور أسامة صبور
وحصل القاهرة 24 على نص التحقيقات في قضية طبيب الساحل، وحوت الأوراق على اعترافات الطبيب أحمد شحته في التحقيقات وجاءت أقواله أمام جهات التحقيق، كالتالي:
أنا كنت في شقة أبو وافية مستني أحمد فرج المساعد بتاعي هو وأسامة، وأول ما أحمد فتح الباب ودخل هو وأسامة، أنا وأحمد كتفنا أسامة، وهو حاول يصرخ فحاولنا نسكته معرفناش، فجبت الحقنة من على الترابيزة وحقنته في الوريد اللي في رقبته، وأسامة دروخ ووقع على الأرض وموبايله اتكسر فأخدته وحطيته في مية عشان ميلقطش شبكة، وفتشته وطلعت محفظته وللاسف لقيت فيها 200 جنيه بس وفيها حوالي 5 بطاقات ائتمان، وأنا من لحظة دخول أسامة الشقة وأنا مبتكلمش خالص عشان ميعرفنيش، وبعد نص ساعة من حقن أسامة ابتدى يفوق وابتدى صوته يعلى، فاديناله العصير واديناله مخدر تاني، عشان مينفعش يفوق ويفضحنا، وهو كده عرف مكان الشقة وشكل أحمد فرج وممكن يبلغ عننا.
وقررنا نقتل أسامة صبور طبيب الساحل، وننقله عيادتي اللي في الخلفاوي، ونزلت استأجرت كرسي متحرك، وسيبتلهم 500 جنيه رهن، وطلعت الشقة بالكرسي، وانا واحمد لبسنا أسامة نضارة شمس سوداء وقعدناه على الكرسي، مع الدنيا كانت ليل بس عشان ميشوفش ملامح وشي كويس، ونزلنا اخدنا توك توك، وروحنا بيه على العيادة، ونزلنا قبل العيادة. بمسافة وزقينا أسامة للعيادة والكلام ده كان الساعة 4 الفجر.
في الوقت ده أسامة صبور كان مدروخ بنسبة 40% والنسبة تخليه لا قادر يتحرك أو يصرخ أو يقاوم، وغمينا عينيه وحطينا سماعات على ودانه وبلستر على بوقه.
