زوجة المتهم بقتل منجد المعادي: جوزي بيغير لما بتعامل مع رجالة وكنت مخطوبة للمجني عليه
كشفت التحقيقات في القضية رقم 12126 لسنة 2023 جنايات حلوان، تفاصيل مقتل شاب يدعى أيمن عابد، والمعروفة إعلاميا بـ منجد المعادي، وأوضحت وجود علاقة عاطفية فيما بين المجني عليه والمدعوة أ.ي - زوجة المتهم بقتل المجني عليه سيد. س، وعقب اكتشاف زوجها وجود تلك العلاقة قرر التخلص من المذكور وإزهاق روحه.
التحقيقات في قضية مقتل منجد المعادي
وحصل القاهرة 24 على نص التحقيقات في القضية، وجاءت أقوال زوجه المتهم كالتالي:
س: ما علاقتك بالمتهم؟
ج: هو جوزي.
س: هل ما زالت تلك الزوجية قائمة؟
ج: هي موجودة على الورق لكن احنا فيه بينا مشاكل واحنا بعيد عن بعض الفترة دي
س: وما طبيعة تلك الخلافات فيما بينكما؟
ج: هو دايما بيضربني ويبهدلني عشان هو غيور جدا وعنده مشاكل مع أي راجل أنا بتعامل معاه حتى المدرس بتاع الأولاد.
س: ومنذ متى نشأت تلك الخلافات تحديدا؟
ج: من ساعة ما اتجوزت والعلاقة كلها مشاكل في مشاكل.
س: وما تحديدا آخر خلاف حصل بينكما؟
ج: هو آخر خلاف ما بينا زي أي خلاف قبل كده بسبب المواعيد والتأخير أو إني أروح عند أمي لإن هو دايمًا عنده شكوك فيا وبيضربني وآخر مرة لما ضربني رديت عليه وقولتله أنا تعبت بقى وإني هسيبله البيت ومش هكمل بالطريقة دي وفعلا فقعدت عند أمي وطلبت منه الطلاق
س: وما الذي أدى إلى ذلك الخلاف؟
ج: أنا رفعت عليه قضية تمكين واتمكنت من الشقة بالمشاركة معاه.
س: هل هناك محاضر حُررت بشأن تلك الخلافات؟
ج: أيوه أنا عاملة 3 محاضر قبل كده بالضرب والاتلاف والخلع.
س: وما الذي آلت إليه تلك المحاضر؟
ج: أنا الصراحة معرفش هي وصلت لإيه.
س: وما الذي آلت إليه قضية الخلع المرفوعة من قبلك ضده؟
ج: هي القضية لسه ما اتحكمش فيها.
س: وما الذي دعاكِ لتحريك مثل تلك الدعوى؟
ج: عشان هو بيضربني ودايما بيعمل مشاكل معايا وبيغير بشكل صعب جدا ومبهدلنا
س: وما قولك فيما قاله المتهم سيد عمر بتحقيقات النيابة العامة إن المجني عليه قال إنه سيطلقك من زوجك للزواج منك مما أثار حفيظته؟
ج: الكلام ده مش صح، أنا عارفة إن أیمن يقول كده فعلا بس بينه وبين أهله وخاصة مع أحلام بنت أخته ولكن مش زي ما بيقول سيد إن الموضوع معروف في المنطقة الكلام ده مش صحيح.
س: هل هناك أسباب أخرى للخلاف فيما بينكم؟
ج: هو فيه المشاكل العادية بين أي اتنين متجوزين بس هو عنده مشكلة الغيرة زيادة ودي سبب أكتر المشاكل.
س: وما مدى علاقتك بالمجني عليه منجد المعادي تحديدا؟
ج: هو المجني عليه كان خطيبي قبل ما اتجوز المتهم وجارنا في المنطقة من زمان ومحصلش نصيب ومفيش أي علاقة تاني أكتر من كده ومليش علاقة بيه خالص.
س: ألا يوجد بينكما ثمة تواصل في الوقت الحالي؟
ج: لا خالص.
س: وما قولك فيما قرره المتهم بتحقيقات النيابة العامة من وجود علاقة فيما بينك وبين المجني عليه منجد المعادي؟
ج: الكلام ده مش حقيقي.
س: وما قولك فيما أضافه سالف الذكر من أن والدتك وحال نشوب أي خلافات بينك وبين زوجك تخبره بأن
يطلقك وأن عريسك موجود؟
ج: هي أمي قالتله كده مرة واحدة زمان في بداية الجواز ولما زعل وجه قالي قلتله دي بتقولك كده عشان تخلي بالك مني لكن هي مش بتقوله كده في كل خلاف زي ما بتقول.
