استشاري العظام بمعهد ناصر في تحقيقات قضية طبيب الساحل: أنا اللي بعتلهم أسامة بعد ما صدقتهم | خاص
حددت محكمة الاستئناف بالقاهرة يوم 2 سبتمبر المقبل؛ لنظر أولى جلسات محاكمة المتهمين في قضية مقتل طبيب الساحل أمام جنايات الدائرة الأولى برئاسة المستشار عبد الغفار جاد الله.
تحقيقات قضية مقتل طبيب الساحل
وأمرت النيابة العامة بإحالة أحمد شحتة طبيب بشري، وامرأة تربطه بها علاقة زواج عرفي تدعى إيمان، وأحمد فرج مشرف إداري يعمل بعيادته، إلى محكمة الجنايات بعدما انتهت تحقيقاتها معهم إلى ثبوت اتهامهم بجناية قتل طبيب بشري عمدًا مع سبق الإصرار المقترنة بجنايات خطفه بالتحايل، وسرقته بالإكراه، واحتجازه دون وجه حق، وتعذيبه بدنيا قبل القتل؛ لرغبتهم في الاستيلاء على أمواله، بعدما أوعز إليهم الطبيب المتهم بذلك لمعرفته بالمجني عليه وعلمه بثرائه.
وجاءت أقوال استشاري العظام بمعهد ناصر في التحقيقات كالتالي:
يوم 3 يونيو 2023، روحت معهد ناصر عشان أباشر شغلي ولستة العمليات اللي عندي، وكان معايا الطاقم الطبي بتاعي اللي من ضمنهم أسامة صبور، وفي اليوم ده جالي مكالمة على تليفوني من واحدة ست عرفتني بنفسها على إن اسمها مارينا غطاس على ما أفتكر، وقالتلي إن والدتها عملت عملية شرايح ومسامير عندي من حوالي سنة، وإن والدتها وقعت على رجليها ومحتاجة حد يبص عليها في البيت لإن سنها كبير ووزنها تقيل، ومش هتقدر تتنقل المعهد وعايزة كشف منزلي فرديت عليها وقولتلها أنا مش بطلع كشوفات منزلية، بس هشوفلها حد من النواب لو فاضي يطلع، وقولتلها إن عامة لستت العمليات النهاردة طويلة ومش هينفع حد يطلع الكشف النهاردة وقولتلها ابقي اتصلي بيا على آخر اليوم عشان أقولك على النايب اللي هيطلع، وفي آخر اليوم فعلا على الساعة واحدة صباحا الست ده رجعت اتصلت بيا فرديت عليها وكان جنبى في الوقت ده الطبيب المقيم أسامة صبور، وقولتلها خدي الدكتور أسامة معاكي على التليفون عشان هو اللي متاح يجيلك البيت.
بعدها دكتور أسامة صبور طبيب الساحل، كلمها من خلال تليفوني وتواصل معاها عشان يرتب الزيارة المنزلية لوالدتها في مساء اليوم التالي، ومن بعدها أنا معرفتش أي حاجة من دكتور أسامة لحد ما روحت يوم 10 يونيو 2023، وسمعت من زمايله إنه متغيب من يوم 4 في الشهر، ويوم 14 عرفت من الصفحة الرسمية لمعهد ناصر إن أسامة اتقتل ويوم 18 عرفت من الصفحة الرسمية للنيابة العامة إن اللي قتل أسامة زميله أحمد شحتة الطبيب المقيم في قسم العظام بمعهد ناصر عشان يسرقه وبعد كده دفنه في عيادته وردم عليه التراب وكان مشترك معاه واحدة محامية وواحد تاني.
س: ما مضمون المحادثة الأولى؟
ج: قالتلي إن أمها عاملة عملية من سنة عندنا وعايزة كشف منزلي لأنها وقعت على رجليها ومش هتعرف تنقلها المستشفى لأنها كبيرة في السن ووزنها تقيل فرديت عليها وقولتلها أنا مش بطلع كشوفات منزلية بس هشوفلها حد من النواب لو فاضى يطلع وقولتلها إن عامة لستة العمليات النهاردة طويلة وابقي اتصلى بيا على آخر اليوم عشان اقولك على النايب اللى هيطلع.
س / وعلاء انتهت؟
ج/ قولتلها تبقى تتصل بيا على يوم أكون خلصت عمليات وأشوفلها مين النايب اللى هيروح لوالدتها بكرة.
س / وما الغرض من المحادثة الثانية؟
ج / عشان حد دلها مين اللي هيطلع كشف منزلي على والدتها.
س / وما زمانها؟
ج / يوم 4/6/2023 حوالى الساعة 1 صباحًا.
س / وما مضمون المحادثة الثانية؟
ج رجعت اتصلت بيا وعرفتنى بنفسها تانى فقولتلها النايب اللى هيطلع الكشف المنزلى اسمه أسامة.
س / وعلام انتهت محادثتكما الثانية؟
ج مقفلتش معاها التليفون وقولتلها خدي أسامة واقف جنبى كلميه واديت التليفون فعلا لأسامة عشان يرتب معاها.
س / وما مضمون ما دار بينهما من حديث؟
ج / أنا وقتها كنت واقف جنب أسامة وساعتها ملاها رقم تليفونه وقالها ابقى كلميني بكرة وهقوالك هاجي الساعة كام.
س / وعلام انتهى حديثهما؟
ج قفل معاها المكالمة بعد ما قالها تتواصل معاه بكرة واداني التليفون
س / وكيف اتصل علمك بالواقعة؟
ج أنا لما روحت يوم 10/6/2023 معهد ناصر سمعت إن أسامة متغيب من يوم 4/6/2023 بالليل من ساعة ما راح الكشف المنزلي على والدة الست اللي اسمها مارينا اللي كلمتني يوم 2/6/2023 بالليل عشان كانت عايزه حد يكشف منزلي على والدتها ورشحتلها دكتور أسامة، ويوم 14/6/2023 عرفت من الصفحة الرسمية لمعهد ناصر إن أسامة اتقتل ويوم 18/6/2023 عرفت من الصفحة الرسمية للنيابة العامة إن اللى قتل أسامة زميله أحمد شحته الطبيب دفنه في عيادته وردم عليه التراب.
س/ وما الذي وقفت عليه؟
ج / أنا عرفت ان أسامة متغيب من يوم الحد الموافق 4/6/2023 بليل وانه في اليوم ده استاذن من المستشفى عشان يطلع الكشف المنزلي اللي أنا رشحته ليه لما الست كلمتني يوم 3/6/2023 وانه من بعد ما طلع مرجعش المستشفى تانى لحد ما الشرطة اكتشفت انه مدفون في عيادة دكتور احمد شخته زميله في معهد ناصر وعرفت بعد كده ان احمد شحته استدرجه عن طريق الست اللي كلمتنى وكانت عايزة كشف منزلى نامها وتواصلت مع أسامة واسامة كان مش مخون
وراح زي ما الست قالتله لكن بعد كدة قتلوه زى ما النيابة العامة بينت على الصفحة الرسمية بتاعتها.
س / وما الأسلوب المتبع لاستدراجه بداءة؟
ج/ الحيلة.
س/ وما حيلهم؟
ج الحيل اللي عملوها انهم كلموني في نفس اليوم اللي انا ببقي موجود فيه في المستشفى بعمل عمليات وكانوا عارفين ومتأكدين إن أسامة موجود معايا لأنه من فريقى الطبي ده غير إن الست اللي كلمتني ادعت كدب ان اسمها مارينا غطاس وانى عملت لوالدتها عملية من سنة وفعلا الاسم ده مش غريب عليا فاكيد هما تعمدوا يقوللى الاسم ده على أساس ان اهل المريضة لما يكلموني ويقوللى محتاجين كشف منزلى هبقى متعاون معاهم، وبرضو من ضمن الحيل اللى هما عملوها وأنا عرفتها انهم بعتوا واحد تبعهم على أساس انه اخو الست اللي كلمتني واسمه ميخائيل ناحية معهد ناصر عشان ياخد أسامة ويستدرجه على المكان اللي هما متفقين عليه وفيه حاجة برضو عرفتها من المستشفى بعد اللى حصل ان أسامة من ساعة ما اختفى كان أحمد شحته بينزل المستشفى عادى ويعمل نفسه بيسأل عليه.
س / كيف جرى استدراجه؟
ج واحدة ست كلمتني وكذبت عليا وفهمتني ان اسمها مارينا غطاس وأنى عملت عملية لأمها من سنة وقالتي إن أمها وقعت على رجليها ومحتاجة كشف منزلى ليها عشان سنها ووزنها ميسمحش تروح المستشفى وأنا بحسن نية قولتلها كلميني على آخر اليوم عشان أشوفك نايب يجيلك كشف منزلي عشان إحنا مابنطلعش كشف منزلى واتصلت بيا واديت تليفوني لأسامة عشان يظبط معاها الميعاد وراح فعلا تانى يوم وعملوا فيا عملتهم.
س / ولمَ وقع الاختيار عليك لاستدراجه؟
ج / أكيد عشان أحمد شحته شغال في معهد ناصر وعارف ان يوم السبت أنا اللي ببقي موجود، وإن أسامة معايا من ضمن فريقي، وعارف كمان إن لو فيه حالة حرجة محتاجة كشت منزلي کلمتنی هرشحلها أسامة، بحكم إنه على طول في المستشفى ومن أحدث النواب وهو دايما اللي بيتبقى معايا في آخر اليوم.
