المتهم بإنهاء حياة زوجته بالنزهة: مكنش جايلي نوم فخنقتها وهي نايمة
كشفت التحقيقات في القضية رقم 1071 لسنة 2022 كلي شرق القاهرة والمتهم فيها حسن.أ 43 سنة بقتل زوجته باستخدام سلاح أبيض بسبب شكة في سلوكها وإثر مشادة كلامية بينهما أخرج سلاحا أبيض وأنهى حياتها بمنطقة النزهة.
اعترافات قاتل زوجته بالنزهة أمام جهات التحقيق
وحصل القاهرة 24 على نص أقوال المتهم، إذ قال أمام جهات التحقيق: أنا اتعرفت على مراتي من حوالى 20 سنة علشان كنا جيران فى عين شمس وكنا بنحب بعض وبقالنا 18 سنة متجوزين وكانت الدنيا كويسة ما بينا مكانش فيه أي حاجة ولا في مشاكل وكنت بشتغل في قهوة أبويا ومكنش ليا مصدر دخل تاني لحد ما قررت أخد مراتي وأسافر برة البلد عشان أحسن دخلي واشتغلت طباخ وفضلت برة مصر 6 سنين وكانت مراتي معايا.
وتابع المتهم: وضعي المادي اتحسن وكان دخلي 3000 ريال سعودي في الشهر ومراتي كان شعال جليسة أطفال وكان مرتبها 500 ريال ولما وضعي المادي اتحسن قررت إني أرجع مصر علشان أعمل مشروع ودخلت شراكة في بناء العمارة بعد ما كنت عايش في إيجار.
وأضاف المتهم: بسبب مشاكل الحمل ربنا ما أرادش إننا نخلف أطفال وكان بيحصل حمل لكن كل مرة كانت مراتي بتسقط لحد ما في يوم من 6 سنين واحد صحبي كلمني في الموبيل وقالي إنه لقي ناس بترمي طفل في الشارع وهو كان عارف مشكلة الإنجاب اللي عند مراتي فاقترح عليا أخد الطفل ده وأربيه وأنا أخدته وطلعت به على مكتب صحة عين شمس وكان فيه ناس هناك في مكتب الصحة كانوا بيبعوا إخطارات ولادة واشتريت واحد بحوالى 200 جنيه منهم ودخلت ببطاقة بتاعتي وبطاقة مراتي وقسيمة الجواز ونسبته لنفسي.
وأشار المتهم: بعد فترة بدأت تحصل مشاكل ما بينا لأنها كانت بتشك فيا بسبب إني أن كان فى ستات بيكلموني وكانت بتعصبي جامد واللي حصل يوم الواقعة الساعة 4 الفجر مكنش جايلي نوم وكنت مكتئب ولقيت مراتي نايمة فقررت إني أخنقها من رقبتها وهى نايمة هي صحيت وقعدت تصرخ وروحت سايبها وطلعت قعدت برا فى الصالة وهديتها وبعد كده دخلت نمت ولما صحيت نزلت الكافيه لقيتها بتكلمني بتقولي إنها لمت شنطها وهتروح لأختها.
وفي وقت سابق قضت محكمة شمال القاهرة بمعاقبة المتهم حسن.أ بالإعدام شنقا لاتهامه بقتل زوجته بمنطقة النزهة، كما قضت بمعاقبته بالسجن المشدد 3 سنوات وغرامة 10 آلاف جنيه بتهمة تعاطي المواد المخدرة.
