المتهم بإنهاء حياة زوجته بالنزهة: خلصت عيلها ونزلت ألعب طاولة في القهوة
كشفت التحقيقات في القضية رقم 1071 لسنة 2022 كلي شرق القاهرة والمتهم فيها حسن.أ 43 سنة بقتل زوجته باستخدام سلاح أبيض بسبب شكه في سلوكها بمنطقة النزهة، تفاصيل جديدة.
اعترافات قاتل زوجته بالنزهة أمام جهات التحقيق
وحصل القاهرة 24 على نص أقوال المتهم والتي جاءت كالتالي:
قال المتهم أمام جهات التحقيق: قبل ما اقتل مراتي بقترة بدأت تحصل مشاكل ما بينا لأنها كانت بتشك فيا بسبب إني كان في ستات بيكلموني علشان يحجزوا الكافيه وكده وخلافات زوجية تانية عادية، وأنا أوقات كنت بضربها وكمان كنت بشك فيها علشان لقيت رقم بيتصل بيها بالليل فأنا شكيت إنها تكون تعرف رجالة عليّا بس مكنتش متاكد، وهي في مرة طلبت الطلاق وأنا طلقتها وبعد كده رجعتها بحوالي عشرين يوم وكانت عاملة فيا محضر ولما رجعتها راحت اتنازلت عنه.
وتابع المتهم: قصة الاكتئاب بقالها فترة تقريبا 8 شهور قبل ارتكابي للجريمة وكنت باخد دوا بس مش عارف اسمه ومش فاكر اسم الدكتور بتاعي، وكنت باخد مرتين في اليوم وبعد كده باخد مرة وبعد كده كل يومين باخد وبعد كده قطعت من حوالي تلات شهور وباخد الجرعات بمزاجي من ورا الدكتور وكنت بشرب حشيش وشربت قبل الجريمة بيومين واحد اداني سيجارة وشربتها في البيت.
وأضاف المتهم: اليوم اللي قتلت فيه مراتي حصلت مشكلة كبيرة وبعد ما صالحتها كلمتني وقالتلي إنها بتلم هدومها وهتروح لأختها، طلعت عشان أهدّيها وأمنعها ومتمشيش فشدينا مع بعض في الكلام وأنا اتعصبت لقيت نفسي بجيب المطواة من الدولاب وروحت داخل عليها المطبخ وفضلت أخبط فيها لحد ما وقعت على الأرض جبت سكينة مطبخ وروحت جرحتها من رقبتها وبعد كده دخلت غیرت هدومي وسبتها على السرير عشان كان عليها دم ونزلت قعدت في الكافيه، وضربتها كذا طعنة في منطقة الصدر والبطن.
وأكمل المتهم: مكنتش حاسس بنفسي وأنا بعمل كده وكانت المسافة بينا تقريبا أقل من متر كان وشنا في وش بعض لما مسكت مطواة قرن غزال كنت شايلها في دولاب اوضة النوم، وندمت لأنها كانت جدعة، ولما ماتت انا نزلت قعدت في الكافيه لعبت طاولة وبعدها بشوية لقيت أخوها بيقولي إنه بيتصل بيها ومش بترد وطلع خبط عليها ومش بتفتح وقلتله إني أنا سايبها فوق نايمة طب خد المفتاح واطلعلها عشان في ناس جيالي الكافيه.
وتابع المتهم: قلت لأخوها خد مفتاح الشقة واطلع لاختك عشان ميعرفش إن أنا اللي قتلتها، ولما طلع بشوية جالي تليفون من جارتنا اللي في الدور التاسع بيقولولي إن مراتي مقتولة في الشقة، وإنهم اتصلوا بالشرطة وجات وخدتني أنا وأخوها.
وفي وقت سابق قضت محكمة شمال القاهرة بمعاقبة المتهم حسن.أ بالإعدام شنقا لاتهامه بقتل زوجته بمنطقة النزهة، كما قضت بمعاقبته بالسجن المشدد 3 سنوات وغرامة 10 آلاف جنيه بتهمة تعاطي المواد المخدرة.
