حسام داغر يشتري غرفة نوم سامية جمال من أحد المزادات.. ويعلق: أنا من عشاقها وهي قيمة فنية كبيرة
علق الفنان حسام داغر على شرائه غرفة نوم الفنانة الراحلة سامية جمال، ضمن مزاد أُقيم على هذه القطعة، كما أعرب عن سعادته باقتنائها.
وقال حسام داغر في تصريحات لـ القاهرة 24: أنا كنت من عشاق سامية جمال فحبيت إن حاجة زي دي تكون عندي وأقدر أحافظ عليها، فلما اتعرضت عليا في المزاد شوفت تفاصيل جمالها، فيها تفاصيل فنية تليق بفنانة كبيرة زيها.
وأردف داغر: لما اتعرضت في المزاد قولت ممكن ناس كتير متقدّرش قيمة الجمال ده، ولكن لقيت إن كان في منافسة قوية وكان في كذا جامع للتُحف، كانوا داخلين معايا المنافسة بس رست عليا الحمد لله، الأوضة قيّمة فعلا ولها قيمة فنية، والخشب الزان اللي معمولة منه برضه قيّم، فـ ليها كذا قيمة مش مجرد قيمة إنها كانت خاصة بالراحلة سامية جمال.
حسام داغر: تجميع الأنتيكات هواية عندي
وأضاف حسام داغر، أن تجميع الأنتيكات هي هواية قديمة عنده، قائلا: أنا عموما من الناس اللي بتحب تجمع أنتيكات دي هواية عندي، وبحب أشتري لوحات لفنانين مشاهير، لكن إني أشتري قطعة كاملة لحد معروف كانت أول مرة المرة دي.
واختتم حسام داغر حديثه قائلًا: طبعا قيمة الغرفة المالية كانت كبيرة وده شيء طبيعي، بس الحاجات دي بتكون غير معلنة، وفي الآخر قيمة الحاجة بتكون أكبر بكتير من اللي دافعينه فيها.
حسام داغر يعلن شرائه لغرفة نوم سامية جمال
من جانبه، نشر حسام داغر مجموعة صور لغرفة الراحلة سامية جمال، والتي حصل عليها واشتراها من مزاد، عبر حسابه الرسمي بموقع إنستجرام، وعلق قائلًا: أنا اشتريت غرفة نوم سامية جمال من مزاد أنتيكات.
