أجور بعض الفنانين مش حقيقية وبتستفز الجمهور.. بشرى: أنا عليا أقساط وقروض والفن مهنتي مش بيت أبويا
كشفت الفنانة بشرى أنها تعاني مثل بعض الناس من الأقساط والقروض، مؤكدة أن ما ينشر عن أجور الفنانين غير حقيقي ومعظمها أرقام غير حقيقية تستفز الجمهور.
وقالت بشرى في ندوة تكريمها في القاهرة 24: هو فيه حد معلهوش أقساط دي شغلانة مش ورثة دي مهنتي مش بيت أبويا وأنا بشتغل وبعمل في هذا المكان، والناس فاكرة أنك علشان منتج يبقى أنت غني أو معاك فلوس كتير، ولكن الحمد لله هي مستورة ولكني زيي زي الشعب كله عليا أقساط وقروض، لأن ساعات بنقعد سنين كتير منشتغلش.
وأضافت بشرى في ندوة تكريمها بـ موقع القاهرة 24: فيه أرقام بتتقال عن أجور الفنانيين بتكون مش صحيحة، والفنان بيكون عايز يبين نفسه مطلوب وبيتخانقوا عليه المنتجين، وساعات المنتجين بيضربوا في بعض علشان يقولوا الفنان ده معايا أنا، ولكن ممكن اتنين تلاتة أجورهم عالية.
وأكملت بشرى: ده كلام مستفز وبيستفز الجمهور والناس كادحة وبتشتغل وعايزة تربي ولادها وتدخلهم مدارس وبيشتغلوا شغلانة واتنين وتلاتة، ده الشعب وإحنا زي الشعب، هما اتنين وتلاتة فوق بس اللي بيجيبوا أرقام وبياخدوهم في الإعلانات، ولكن باقي أعضاء النقابة ناس بتعاني وكتير منهم قاعدين في البيت ومحبطين، وكتير من النجوم سنين شبابهم وعطائهم بتضيع علشان مفيش فرصة ومش لاقيين شغل.
وأكدت بشرى، إنها لا تلتفت للأجر خلال دخولها عمل فني، قائلة: أنا مش بشتري الأجر أنا بشتري العمل، الموضوع إيه وبشتغل مع من والشركة مين وهيقدملي إيه، والأجر بيكون على حسب الظروف، وأولاد حريم كريم خدت فيه نفس أجري اللي خدته في فيلم جدو حبيبي اللي عملته 2012، واللي أخدته أجر حطيته في دعاية الفيلم.
بشرى: مش معنى إني منتجة يبقى معايا فلوس.. ولكن مستورة الحمد لله
وأوضحت الفنانة بشرى، إن الإنتاج مهنة كأي مهنة أخرى ولا تأتي لها بعائد مادي خيالي كما يعتقد الجمهور، قائلة: الإنتاج ده مهنتي، زي بالظبط مهرجان الجونة أنا بشتغل فيه هو مش بيت أبويا، ونفس الشيء كوني منتجة، والإنتاج ده فيه تمويل وإنتاج ومنتج منفذ ومنتج فني، فيه مراحل كتير والناس بتخلط بين الممولين والمنتجين، ولكن فيه فرق في واحد بيمول وواحد بينظم التمويل ده في العملية الإنتاجية، يعني لولا أن الممول بيقتنع بيا مش هيمولني.
وأشارت بشرى إلى إنها تركت وظيفتها في مهرجان الجونة السينمائي من أجل دعم الصناعة، قائلة: أنا سيبت دوري في مهرجان الجونة لأني شايفة إن ده مش وقت احتفال بالصناعة، ده وقت تشغيل الصناعة ووقت شايفة أن ربنا جعلني أبقى سبب أن ناس تشتغل قدام الكاميرا وورا الكاميرا، يعني تشغيل صنعة وحرفيين ورا الكاميرا، الناس محتاجة تشتغل مش نحتفل ونسقف بس.
