لقاء الخميسي: اتخانت مرة واحدة في حياتي.. وكنت بدور على أبويا في الرجالة اللي عرفتهم
تحدثت الفنانة لقاء الخميسي، عن علاقاتها العاطفية السابقة، كما كشفت تعرضها للخيانة في وقت سابق بحياتها، قبل زواجها من محمد عبد المنصف.
وقالت لقاء الخميسي خلال تصريحات تليفزيونية: قبل ما أتجوز، الحاجة اللي كانت بتجذبني للراجل، إنه يكون عنده أي صفة من صفات أبويا، وده مش دايما بيبقى حلو لإنها مش بتتحسب كده، وخدت فوق دماغي كتير، كنت بدور على حاجة شبه الراجل ده وبدور على بابايا، لحد ما ربنا هداني وعرفت محمد عبد المنصف.
وألادفت لقاء قائلة: اتعلمت من أفشل علاقة في حياتي، إن مش كل اللي أنت عايزه في شريك حياتك هتاخده، هي مش حسبة، هاخد الراجل بالحاجات اللي مريحاني فيه وهيبقى فيه حاجات مش مريحاني بس هكون مضطرة أقبل بيها، مش هتقدر تلاقي الشخص اللي راسمه في خيالك، يعني أنا وزوجي محمد عبد المنصف مش شبه بعض خالص، مختلفين تماما، النقطة الوحيدة اللي شبه بعض فيها إننا طيبين.
لقاء الخميسي: اتخانت مرة واحدة في حياتي
وتطرقت لقاء الخميسي للحديث عن تعرضها للخيانة في وقت سابق وقبل زواجها الحالي، وقالت: أنا اتخانت مرة واحدة، من واحد كنت عارفة إنه يعرف بنات كتير، ولما عرفت بالخيانة سيبته، مش بواجه خالص، مش همشي وأنا مريحاه، مش لسه هقوله هو عمل إيه، هو يقعد يفرك يشوف هو عمل إيه، وأنا بختفي، وبيبقى الحد ده نفسه يعرف إيه الحصل، عاقب نفسك واقعد فكر.
لقاء الخميسي: باخد بالي أنا بصاحب مين لإني بخاف
وبالنسبة لخيانة الأصدقاء، أشارت لقاء الخميسي إلى أنها لم تتعرض لهذا النوع من الخيانة بشكل كبير، وقالت: على مدار حياتي متخانتش من أصدقاء كتير، لإني باخد بالي أنا بصاحب مين عشان بخاف أوي، وفيه ناس ضربت من تحت الحزام بس هما مش مهمين في حياتي.
وأردفت لقاء الخميسي: وبرضو في ناس مهمين عملوا معايا كده وزعلت أوي واتأثرت ومكنتش مصدقة، ومردتش على الإهانة اللي اتقالتلي ومعاتبتش لإني عارفة من جوايا إني كبيرة، لو حد عايز حاجة ييجي يقولي لكن ميأذنيش في مشاعري، تعالي قوليلي سيبيلي الدور ده ونقعد ونتناقش، لكن هتلف من ورايا مش عايزة أعرفك تاني.
واستكملت لقاء الخميسي: وده حصل معايا كتير، بس بقيت بتسامح دلوقتي، ولما حد يأذيني وأنا أسامحه ده هيوجعه أكتر وضميره هيأنبه، وبرجع أبارك للشخص ده، وهو عارف إنه أذاني، يبقى هو اللي ضميره هيتأنب.
