لوسي: بسيب الفن لما مباخدش القدر اللي أستاهله.. وقرار الاعتزال مش بيكون بإيدينا |خاص
أكدت الفنانة لوسي أنها لم تفكر يومًا في فكرة اعتزال الفن، كاشفة عن رأيها في ترك الفنانين لمهنة الفن بسبب قلة الأعمال المعروضة عليهم.
وقالت لوسي في تصريح لـ القاهرة 24: إحنا بنعتزل وبنرجع، لما تقعدي 8 سنين متقبليش عمل يبقى إنتى كده معتزلة الفن علشان مش لاقيه حاجة كويسة تشتغليها.
وتابعت لوسي: في فنانين كتير زي الأستاذ لطفي لبيب قعد كذا سنة في بيته بعيد عن الفن ولما لاقى شغل كويس رجع تاني وتراجع عن قراره واشتغل تانيِ.. عشان كده نقطة الاعتزال مش بتكون بإيدك.
وأضافت لوسي: قرار الاعتزال بيكون على حسب كل فنان وحساباته هل هتقبلي تهينى نفسك عشان المادة ولا هتنتظرى تعملى حاجة ترفع من شأنك؟، هي دي الفكرة إحنا كلنا بنعتزل ونرجع مجرد إنك تقعدي في البيت ده اعتزال، لكن بنرجع لما بنلاقي شغل كويس يناسب تفكيرنا ومتطلباتنا.
وحول تفكيرها في فكرة الاعتزال، ردت لوسي: فكرة إني أسيب الفن خالص مجتليش على بالي، أنا بسيب الفن لما يكون في حاجة مش عجباني أو الورق مش كويس أو الشركة المنتجة مش مدياني القدر اللي أستاهله، لكن لما بتيجي حاجة كويسة بتراجع عن قراري وأعتقد كل الفنانين كده.
أعمال لوسي
ويعد مسلسل المداح 3، آخر أعمال لوسي، حيث عرض العمل في موسم رمضان ماضي لعام 2023، حيث ضم العمل العديد من الفنانين مع لوسي كل من الفنان حمادة هلال، خالد زكي، يسرا اللوزي، هبة مجدي، محمد رياض، دنيا عبد العزيز، رانيا فريد شوقي، محمد عز، خالد سرحان، أحمد ماهر، تامر شلتوت وغيرهم، والمسلسل من تأليف أمين جمال ووليد أبو المجد وتحت قيادة المخرج أحمد سمير فرج.
