جمال يوسف: تعلمت من محمد صبحي حاجات عايش بيها لحد دلوقتي.. ونور الشريف زاد من وعي وثقافتي
كشف الفنان جمال يوسف الدور الذي يتمنى تقديمه إلى جانب حديثه عن أكثر فنان أثر فيه خلال مشواره الفني، كما عبر عن استيائه من منتقدي الفنان فادي خفاجة بسبب أزمته الأخيرة.
جمال يوسف: أتمنى تقديم دور الأب مع المتغيرات التي طرأت
وقال جمال يوسف لـ القاهرة 24: أتمنى أقدم دور الأب المصري في ظل المتغيرات اللي طرأت عليه الاجتماعية والاقتصادية لأن الأب هو السند والضهر للبيت كله وأنا عرفت قيمة أبويا لما بقى عندي أولاد وأتمنى لو الزمن يرجع تاني ما زعلهوش في أي حاجة يقولها ليا لأن الأب هو السند والضهر وعمود البيت.
وأضاف جمال يوسف: الأب ده ما يعرفش ينام لو عيل عنده مشكلة، والأسرة محور حياته كلها، خاصة الأب اللي بيحتوي زوجته وأولاده وأسرته وبيضلل عليهم وعارف كل واحد مشكلته إيه وكل واحد طلابته إيه وأنا نفسي أقدم دور أب مصري متوسط الحال اللي ولاده بيتعملوا وبيتغير عليه الظروف الاقتصادية وبتتحطن زي أي راجل، وكذلك في ظل المتغيرات الاجتماعية لان الولاد أصبحوا منفتحين على كل شيء ومتخلين أنهم فاهمين كل حاجة.
جمال يوسف: نور الشريف ومحمد صبحي أكثر نجمين أثروا في
وأكد جمال يوسف أن بعض النجوم كان لهم فضلًا كبيرًا عليهم ومنهم الفنان محمد صبحي والفنان الراحل نور الشريف، قائلًا: فيه اتنين كان ليهم أثر كبير عليا أولهم أبويا محمد صبحي لأني لما دخلت عنده فرقة مسرح بالعربي الفصيح كان عندي 16 سنة واتعلمت منه كل حاجة عايشها دلوقتي من غير قصد منه ولكن إحنا كنا شايفينه بيعمل إيه وبنقلده واتعلمنا منه يعني ايه مسرح وثقافة وقراءة.
وأضاف جمال يوسف: الأستاذ التاني نور الشريف اشتغلت معاه حضرة المتهم أبي وكان مهتم بيا أكتر من اهتمامه بنفسه، ومن ثم طلبني اشتغل معاه في عرفة البحر بعد الثورة وكنا بنصوره في إسكندرية وبنتقابل الصبح على الفطار الساعة 6 وتيجي العربيات تاخدنا الساعة 7 وكنت كل يوم الاقيه بيقرا كتاب واتناقش معاه خلال الشهر والنص زاد فكري الثقافي ووعي.
وأردف: اتعلمت منه وأنا بمثل لو فيه حزن ما أجريش على الدموع والبكاء وأني ممكن احطم مشاعر اللي قدامي من غير دمعة واحدة وأخلي الدمعة تصاعدية ما يباقش ظروفي صعبة من أول مشهد أعيط.
وأشار جمال يوسف إلى أنه كان يحضر لعمل فني وتوقف إنتاجيا لافتًا في الوقت نفسه إلى أن أكثر الأعمال التي نالت إعجابه مسلسل تحت الوصاية لمنى زكي قائلًا: أنا بحب الدراما الهادفة.
جمال يوسف يدافع عن فادي خفاجة
كما أعرب فادي خفاجة عن استيائه من الانتقادات التي تعرض لها الفنان فادي خفاجة بسبب انفعاله في فيديو لايف على تيك توك بسبب عدم حصوله على فرص شغل في التمثيل، والهجوم عليه من قبل الفنانة منة جلال قائلًا: لما نلاقي الواحد أعصابه تعبانة المفروض ننتقده ولا نقف معاه؟، وأنا أعرفه جيدًا وكان أحيانا بيقدم دور ابني في بعض الأعمال وهو حد محترم ومؤدب وفنان وونيس شهره جايز يكون عنده ضغوط نفسية لأنه مش لاقي شغل ولا لاقي يصرف على ولاده.
وتابع: لما يطلع كده نطبطب عليه ولا ندبحه، وأشرف زكي نقيب الممثلين بيحتوي كل الفنانين وقادر يرد على نفسه وهي قالت أنه أساء للفنانين لكنه لم يسء لي.
وأضاف جمال يوسف: ليه قاصدين ندبح بعض هو إحنا عارفين ظروفه إيه، هل هي دي أخلاق الفرسان ده الفارس لما ينزل من حصانه وسيفه يقع ما ينفعش أحاربه وكذلك لو بني ىدم في حالة ضغط نفسي وعصبي أو لحظة ضعف ما أجيش ناحيته الكلام ده مش موافق عليه نهائي، فادي خفاجة خارج من مدسة محمد صبحي أستاذنا كلنا ومحدش عارف الظروف اللي هو فيها يا ريت نكون رحماء وما ندبحش بعض.
