أحمد أخوكي مات.. سيدة تروي تفاصيل وفاة شقيقها داخل حفرة خلال تنقيبه عن الآثار بمنشأة ناصر | تحقيقات
لقي شاب يدعى أحمد عبد المنعم، سائق توك توك، في العقد الثالث من العمر مصرعه، خلال التنقيب عن الآثار داخل منزل أحد الأشخاص، بمنشأة ناصر بالقاهرة، ودفنه المتهمان المشتركان في عملية التنقيب عن الآثار داخل الحفرة، ولم يخبرا أسرته بمصيره.
وفاة شاب خلال التنقيب عن الآثار
وحصل القاهرة 24 على نص التحقيقات في القضية، واستدعت رجال التحقيق سماح عبد المنعم 37 سنة، وتعمل ربة منزل وهي شقيقة المجني عليه، وجاءت أقوالها كالآتي:
اللي حصل إن أخويا شغال على توك توك، ووالدتي يوم التلات كلمتني وقالتلي أخوكي مرجعش من امبارح، وبعدين فضلت أضغط عليها لحد ما حكتلي على العلاقة اللي بين واحد اسمه رشاد وأحمد أخويا، وإن رشاد ده جالنا البيت وخد أخويا في شغل وبیروح عنده يحفر وکده، ومفهمتش برضه أوي بيحفروا ليه بس أنا شكيت، وبعدين والدتي راحت البيت تشوف أخويا وملقتش حد وبعدها كلمتني وقالتلي روحت البيت عند رشاد، ومحدش فيهم في البيت، وروحت المكان عندهم وبعدين كلمت مراته اللي اسمها ميرفت وقولتلها أخويا فين قالتلي أخوكي مين قولتلها أحمد عبد المنعم، قالتلي مجاش عندنا ومشوفتوش من زمان وأنا في المنصورة، قولتلها أنا عرفت كل حاجة، بعد ما أمي حكت لي كل حاجة، وقولنالها لو مجیتيش هنبلغ الحكومة وهنوديكوا في داهية.
وأضافت شقيقة المجني عليه: لحد ما هي جت من المنصورة أو من دكرنس على كلامها، وبعدين دخلت البيت سألتها على أخويا قالتلي معرفش عنه حاجة، قولتلها طب فين الحفرة قالتلي في المطبخ، وهناك لقيت بنتها الصغيرة ويوسف ابنها بيعيطوا وسألتهم مالكم مردوش، فالست قالت لابنها انزل شوف أحمد في الحفرة، وبعدين يوسف نزل وطلع قالي مفيش حد، فقولتله مش مصدقاك قالي لا مفيش حد تحت، وبعدين فضلت أعيط وأقول له يا ابني قولي الحقيقة فقالي عم أحمد ميت تحت، انهرت تماما وبعدها طلعت على القسم واتهمت اللي اسمه رشاد وميرفت إنهم اللي موتوا أخويا.
س: متى وأين حدث ذلك؟
ج: أخویا اختفی یوم 21 أغسطس 2021، وعرفنا انه اتوفى يوم 25 أغسطس الساعة 10 بليل في بيت رشاد آخر شارع الرزاز منشية ناصر.
س: ما سبب ومناسبة تواجدك بالزمان والمكان سالفي الذكر؟
ج: علشان كنت بدور على أخويا عندهم.
س: من كان برفقتك آنذاك؟
ج: كنت أنا وجوزي.
س: ما هي بيانات سالف الذكر؟
ج: كريم أحمد علي إبراهیم.
س: ما هي طبيعة عمل شقيقك؟
ج: هو سواق توك توك.
س: هل أبصرت وقائع ما حدث؟
ج: لا.
س: ما هي علاقتك بالمتهمين؟
ج: معرفهمش غير لما ووالدتي حكتلي بس.
س: ما الذي قررته لك والدتك؟
ج: قالتلي إن اخويا مختفي من يوم 21 أغسطس من الساعة 12 بليل وإنه راح لرشاد ومرجعش من بعدها.
س: ما هو التصرف الذي بدر منك عقب ذلك؟
ج: عرفت أوصل لرقم اللي اسمها مرفت وكلمتها.
س: ما مدى تواصلك مع المتهمة آنذاك؟
ج: كلمتها في الموبايل.
س: ما هو مضمون الحوار الذي دار بينكما؟
ج: قولتلها أخويا فين، قالتلي معرفش عنه حاجة قولتلها لا أخويا كان بيجي عندكم وأمي حكتلي كل حاجة وهوديكوا في داهية، فقالتلي أنا في المنصورة وهجيلك دلوقتي متبلغيش الحكومة وقعدت استنيتها أنا وجوزي قدام البيت.
س: متى نما إلى علمك بقيام شقيقك بالتنقيب عن الآثار مع المتهم رشاد حمدان جاد الرب؟
ج: يوم 24 أو 25 أغسطس 2023.
