نجل محمد ثروت: أنا وخطيبتي قررنا منعملش فرح.. هنعمل مشروع لغير القادرين
كشف المخرج أحمد ثروت، نجل الفنان محمد ثروت، تفاصيل تخليه عن إقامة حفل زفاف والبدء في مشروع خدمة الغير قادرين وذوي الهمم.
وقال أحمد ثروت في لقائه مع الإعلامية منى الشاذلي، في برنامج معكم منى الشاذلي، المذاع عبر شاشة قناة ON: خطيبتي وبابا كانوا رافضين يصوروني في المستشفى، لكن كان لازم أوثق التجربة علشان أفيد وأستفيد، وإلا التجربة تروح على الأرض، وكنت خايف أن مخي وتفكيري يتأثر وكنت بكتب كل يوم، وقولت لهم لو مربتوليش البعبع مش هقوم منها.
وتابع نجل محمد ثروت: اتكلمت مع خطيبتي وقلت لها إحنا حياتنا توقفت، هل تمانعي لو ربنا كرمنا ما نعملش فرح، وفكرت نعمل بالمبلغ تطبيق موبايل يا رب يقدر يخفف معاناة ناس كتير.
وأضاف: هو تطبيق خدمي للمرضى غير القادرين المدرجين على قوائم الوزارات المعنية، إذا حد محتاج طرف صناعي أو كرسي متحرك، ولا تتوفر لديه المادة.
نجل محمد ثروت يروي تفاصيل إصابته بمتلازمة ميلر فيشر
كما كشف نجل محمد ثروت، تفاصيل إصابته بمتلازمة ميلر فيشر، قائلًا: مرة واحدة جاتلي 5 إعاقات بصر وحركة وفقدان القدرة على الكلام، وأول ما فقدت الحركة كلمت أصدقاء ليا من ذوي الهمم هما السبب إني كنت قوي، وسألتهم بنروح الحمام إزاي وبنلبس هدومنا إزاي؟ المفروض لما نشوف حد من ذوي الهمم نوطي ليهم ونقولهم أنتم أبطال، ولو حد كان دخلني الحمام مكنتش هقوم تاني من على الكرسي، زحفت كل يوم للحمام، الإنسان فعلًا ضعيف.
