عابد عناني عن أزمة محمد سلام وبيومي فؤاد: الحياة مش هتقف.. أنا شغال وعندي التزامات أكبر مني
علق الفنان عابد عناني، على أزمة الفنان محمد سلام وبيومي فؤاد، بعدما هاجم الأخير سلام بسبب اعتذاره عن مسرحية زواج اصطناعي تضامنًا مع أهالي غزة.
وقال عابد عناني، في لقائه مع القاهرة 24: فيه تغييرات كتير حصلت الفترة اللي فاتت بناء على الأحداث الفلسطينية وربنا يرحم الشهداء ويا رب سيل الدم ده يتوقف، لأنه أكيد كل بني آدم سواء عربي أو غير عربي أم مسلم أو غير مسلم بيحس بالأزمة دي.
وأضاف عابد عناني: أنا مش مع أو ضد محمد سلام وبيومي فؤاد، أنا شغال مسرح وشايف أن ده اللي المفروض نعمله دلوقتي وأكيد الحياة مش هتقف والمسلسلات اللي بصور فيها مش هينفع أقولهم لأ مش هصور، دي التزامات أكبر مني، وأنا شخصيًا متعاطف جدًا مع القضية الفلسطينية وبالذات الشهداء الأطفال بتجرح وبتأثر جدًا.
وأكمل عابد عناني: مش هيبقى مفيد ليا ولا للقضية الفلسطينية إني أوقف حياتي، وربنا يعدي الأزمة دي على خير وكل اللي بيحصل ده يتوقف لصالح غزة والشعب الفلسطيني.
أزمة محمد سلام وبيومي فؤاد
ومن ناحية أخرى، شن الجمهور هجومًا على الفنان بيومي فؤاد، بعدما رفض موقف محمد سلام، وهاجمه بعد نهاية عرض مسرحية زواج اصطناعي، حيث أكد أن سلام من حقه أن يعتذر عن المشاركة في العمل، لكن ليس من حقه أن يعيب في الفن، وقال في فيديو متداول له خلال تحية الجمهور في مسرحية زواج اصطناعي: من حقك تعتذر عن المشاركة في المسرحية، لكن مش من حقك تغلط في فنك.
