حنان مطاوع: جالي إحباط لإني كنت بقدم أدوار صغيرة لمدة 15 سنة.. وربنا أكرمني آخر 4 سنين
قالت الفنانة حنان مطاوع إنها أُصيبت بالاحباط في بداياتها لأنها طموحة بشكل كبير، ولكنها لن تتغر أبدًا لأنها لا ترى أنها تملك شيئًا من الأساس.
وأضافت حنان مطاوع خلال حوارها مع القاهرة 24: أنا مريت بإحباط قبل ما أوصل، لما كنت باخد أدوار صغيرة على مدار 15 سنة، وربنا كرمني آخر 3 أو 4 سنين، لحد ما أصريت إني أقبل وأحب اللي بعمله وأحس إنه شيء كبير حتى لو محدش حاسس بكده، إلى أن تحس الناس بكده.
حنان مطاوع: الغرور شيء صعب.. وأتغرّ على إيه؟
وأكملت حنان مطاوع: لكن الغرور ده يا رب ربنا ما يكتبه عليا هو صعب أوي بالنسبالي لأني زي ما ببقى مبروزة أوي طموحي واللي عايزة أعمله، مبروزة أوي النهايات وعارفة إن مفيش حد مخلد وهنموت في الآخر وندفن في متر في متر، فأتغر على ِإيه؟.
وواصلت حنان مطاوع: غير إني أدركت إن مفيش حد بيملك حاجة، حقيقي أنا لا أملك شيء، وممكن عُمر بيتك يبقى أطول من عمرك أنت، فلا شباب دام ولا صحة لأي حد عشان تدوم ليا، فـ بتبسط وبسعى وعندي طموح وأحلام وطاقة إني أعمل حاجات كتير بس شايفة النهاية جدا، وماشية بمبدأ سيدنا علي بن أبي طالب، أعمل لآخرتك كأنك تموت غدا وأعمل لدنيتك كأنك تعيش أبدا، فـ أتغر على إيه أنا لا أملك شيء.
حنان مطاوع: محظوظة بعيلتي.. ومامتي عطية ربنا ليا
وتطرقت حنان مطاوع للحديث عن أسرتها الفنية، والدتها الفنانة سهير المرشدي، ووالدها الفنان كرم مطاوع، وقالت: أنا كنت محظوظة جدا بعيلتي، مش عشان هما المشاهير اللي الناس عارفاهم، لأ عشان تركيبتهم نفسها، وإنهم بالفكر ده، وقدرتهم على إنهم يقولوا لأ، لأ بتعززك أوي وبتحميكي، وبتخليكي تنضجي.
وتابعت حنان مطاوع: أنا محظوظة إن مامتي هي مامتي بالتركيبة دي وبكل عظمتها وجمالها، وكل عيوبها حتى، وهي عطية وهدية من ربنا سبحانه وتعالى، وبابا الله يرحمه برغم إني معشتش معاه كتير ومات وأنا مراهقة، بس أثر فيا في حاجات كتير أوي، وأنا تركيبة شخصيتي شبه بابا.
