سيدة تكشف سبب عزوفها عن الزواج لمدة 15 عامًا بعد تجربة مريرة: مريت بأسوأ أيام حياتي
استضافت الإعلامية نورين شحاتة والإعلامي ممدوح الشناوي، في برنامج البيه والهانم، نموذج لسيدة مضربة عن الزواج تدعى مريم منير، وذلك في حلقة اليوم التي تناولت ظاهرة الإضراب أو العزوف عن الزواج.
وكشفت مريم منير خلال استضافتها في برنامج البيه والهانم، أنها عزفت عن الزواج بعد تجربتها مع الزواج بعمر صغير وإنجابها طفلين، مشيرة إلى أنها تزوجت بعمر 19 سنة، وانفصلت منذ 15 عامًا وعلى الرغم من تقدم الكثير لها لكنها رفضت الزواج مرة أخرى.
وقالت مريم منير في برنامج البيه والهانم: اتجوزت وأنا عمري 19 سنة بعد المعهد على طول، وخلفت يوسف عنده 21 سنة وبعدها رامز بعد يوسف بست سنين وأربع شهور، وكان طول الوقت فيه بيني وبين زوجي مشاكل وما كانش فيه اتفاق، وبعد ما خلفت ابني رامز جوزي سابه لحمة حمرا واتجوز وعنده ولاد دلوقتي.
أسوأ أيام حياتها
وأضافت خلال استضافتها في برنامج البيه والهانم: بقالي 15 سنة منفصلة وجالي عرسان كتير ولكني رفضت، لأني مريت بأسوأ أيام حياتي رغم صغر سني، وزوجي ما كانش على قد الثقة لأني حبيته حب كبير، هو كان يعرف ناس قبلي، وكان دايمًا يقولي أنا بحبك والحقيقة أنه ما كانش بيحبني، واكتشفت أنه متجوز وعنده ولاد، واتجوز زواج إنجيلي وغير ملة.
كنت بصرف على البيت من وقت ما اتجوزته
وتابعت مستنكرة: جوزي اتجوز وهو عنده ولدين زي القمر ولو كنت وحشة وغلطت فيك فين حنيتك على أولادك اللي من صلبك؟، كان فيه مشاكل جامدة ودخلت أهلي لكنهم تعبوا من كتر المشاكل، لأني كنت بلجأ ليهم، ولكن البني آدم اللي فيه طبع مش بيتغير، وأنا كنت بصرف على البيت من وقت ما اتجوزته.
وأكملت: اتجوزت صغيرة علشان عيشتي كانت صعبة قلت عاوزة أغير عيشتي، لأن والدي كان صعب والتعامل بالإيد وجالي ناس كتير واخترت ده لأنه قال ليا أنه متعلم في الآخر اكتشفت أنه مش متعلم وأكبر مني بـ 13 سنة، وحاولت أغير مفيش فايدة، ولكن قبل الزواج بيرسم انه كويس وللأسف الخطوبة بينا كانت أقل من ست شهور لأن والدي كان صعيدي ومعندوش فكرة أن بنت تخرج مع واحد.
