نورين شحاتة تناقش الانجذاب الجسدي لشريك الحياة الذكي وتعرض وجهات النظر
ناقشت الإعلامية نورين شحاتة في برنامجها البيه والهانم، الذي تقدمه مع الإعلامي ممدوح الشناوي عبر شاشة القاهرة والناس، مصطلح Sapiosexual، والذي يعني انجذاب الشخص لشريك الحياة عن طريق ثقافته ومعرفته فقط، وليس عن طريق الشكل والإمكانيات.
واستضافت نورين شحاتة دينا إسماعيل مديرة علاقات عامة، والكاتبة جهاد التابعي، ودار بينهم حوار شيف في برنامج البيه والهانم.
وقالت نورين شحاتة في بداية الحلقة موضحة للجمهور مصطلح Sapiosexual: بنتكلم عن تريند اسمه Sapiosexual، وهو عبارة عن الانجذاب عن طريق الثقافة، يعني حد ينجذب لشخص مش عشان شكله وإمكانياته، وده طبعا انحاز ليه أكتر بعض السيدات، وهنعرف ليه بعض البنات اتجهوا الاتجاه ده، هل علشان تريند عاوزين يركبوه ولا عشان محتاجين يكونوا مثقفين أكتر؟ المفروض الطبيعي لما أعرف حد بحس بانجذاب ليه وبعدين بعرف شخصيته أكتر، ولكن ليه الناس اتجهت الاتجاه ده محدش عارف.
من ناحيته قال الإعلامي ممدوح الشناوي: إحنا كرجالة مش بنفكر في الموضوع ده، يعني إيه انجذب لست عن طريق الذكاء والمعرفة؟ يعني أنا عشان عارف حياة الحيوانات تنجذبي ليا؟ فيه حاجات أخرى للانجذاب، فيه متطلبات واحتواء وفهم، يعني إيه أتجوز لو بحب واحد زكي، هو أصلًا لو زكي هيتجوز ليه؟ وأنا شايف بتحبوا تاخدوا الحاجة من بره وتقلدوها هنا في مصر.
تعريف مصطلح Sapiosexual
وقالت مديرة العلاقات العامة دينا إسماعيل عن التعريف الحرفي لمصطلح Sapiosexual: هو إن الانجذاب للذكاء قد يتطور لانجذاب جسدي، والستات اختارت تنجذب للشخص الذكي لإن بعض السيدات بعد الزواج بتلاقي فيه فجوة، خصوصا بعد كورونا لما الزوجين كانوا قاعدين مع بعض في البيت بشكل أكبر، فاكتشفوا إن اللي اتجوز علشان فلوس أو حب، ولذلك بتكتشف إن الثقافة والمعرفة شيء مهم.
وأضافت: اتكلمت مع ناس، وفي واحد قال لي لو لقيت واحدة دماغها عجباني ومثقفة مش هيفرق لي أي حاجة تانية، وأنا بشوف إن مهم جدًا الانجذاب عن طريق الثقافة، لإن لو اتعاملنا كده بانجذاب شكلي وحفظنا شكل بعض هنعمل ايه في حياتنا؟ هنزهق، ومش شرط الذكي ينبهر بحد ذكي.
ووجهت نورين شحاتة سؤالًا لـ دينا إسماعيل قائلة: هل شايفة إني ممكن أنجذب لراجل علشان ثقافته أو لإن دماغه مليانة مش فاضي؟ لترد قائلةً: مش لوحدها، فيه مقومات زي إنه يدور بينكوا حوار أو تكوني مستمتعة بالوقت معاه، لإن لو معاه كل الحاجات من غير الذكاء والثقافة لأ، مهما كان عنده ايه.
بدورها قالت الكاتبة جهاد التابعي: أنا مش ضد الذكاء بحب الذكاء ولكن فكرة أن حد ينجذب لحد بس عشان ذكي دي فكرة بالنسبة لي بتلغي الغريزة تماما، ما ينفعش نلغي غريزة الإنسان لأننا إحنا مش ملايكة إحنا بشر، والغريزة شيء طبيعي جدا، مش عيب إننا نشوف إنها موجودة، وإننا ننجذب لحد عشان صفات بنحبها، ودي مش سطحية، عادي إننا نحب الشكل والشخصية الحلوة والنجاح والفلوس، ولكن السطحية إننا نحب صفة واحدة زي إن الشخص يكون ذكي بس أو معاه فلوس.
