بسنت شوقي: أنا بحب الستات جدًا ومحظوظة إني قادرة أعبر عنهن
تحدثت الفنانة بسنت شوقي، عن تنوع أدوارها وتمثيلها حال الفتاة المصرية على مدار مشوارها الفني، بجانب الحديث عن مشاركتها في فيلم فوي فوي فوي.
وقالت بسنت شوقي، في لقائها مع القاهرة 24: أنا بحب الست جدًا وبحس إنها كائن مليان مشاعر وأحاسيس وكائن حقيقي معقد ورهيف المشاعر، أنا كست محظوظة إني ممكن أعبر عن الكائن الجميل، فالدور اللي ممكن يوري واحدة ست عادية جدًا لكن هتلاقي أن في حاجة في حياتها مكتملة.
أما عن تفاصيل مشاركتها في فيلم فوي فوي فوي، برفقة زوجها الفنان محمد فراج، فعلقت بسنت شوقي: حبيت الفيلم من أول ما قرأته وتوقعت أنه ينجح وطلع أحلى من ما توقعت، وبالنسبة ليا هو عمل توازن بين الأعمال الفنية والتجارية ودي حاجة مبتحصلش، ودي حاجة بقالها فترة في مصر مبتحصلش، والفيلم ده عزيز على قلبي.
بسنت شوقي: الفن فطرة
أما عن إذا ما كانت تحرص على تقديم رسالة من خلال أعمالها الفنية، فقالت بسنت شوقي: أنا مؤمنة أن الفن طاقة ربنا خلقها جوا الفنان، سواء تمثيل أو غُنا أو النحت أو الرسم، مفيش حد بيرسم لوحة معينة عشان يوصل رسالة، الفن ده فطرة ربنا خلقها جوا الواحد وبتطلعيها والناس بتشوف نفسها فيها، يمكن رسالة الفن أن الناس كلها تحس أنهم وحدة واحدة وكلنا نفس الوجع ونفس الفرح.
وتابعت: إحنا ربنا خلقنا كلنا واحد وهي دي يمكن رسالة الفن في المطلق التواصل، أنا مش بدري دروس في الأخلاق، وأنا مش جاية أصلح الكون.
