الشحات مبروك: مش بسأل على عادل إمام خالص.. سيبوه في حاله هو بني آدم مش كوبري | فيديو
تحدث الفنان ولاعب كمال الأجسام سابقًا الشحات مبروك عن النجم عادل إمام، مشيرًا إلى أنه لا يسأل عنه، لكنه يطمئن عليه حينما يجد نجله الفنان محمد إمام سعيدًا.
وقال الشحات مبروك: أنا مطمن على الزعيم طول ما بلاقي ابنه محمد إمام وشه بيضحك لما بنتكلم، مش بسأله عن أبوه خالص، بقول الحمد لله كده الزعيم تمام طالما محمد إمام نفسيته كويسة ومبسوط يبقى الزعيم كويس.
وأضاف: ليه بتحطوا الزعيم في سؤال دايما، سيبوه هو الراجل متكيف بولاده وأعماله ومكانته اللي تعب عشانها أوي علشان يكون الزعيم، إحنا بنحبه لكن مش لدرجة الإشاعات كل شوية، سيبوه يعيش ده بني آدم مش كوبري حديد ولا عمود نور لأ هو روح ودم ولحم ونفسية.
الشحات مبروك يتحدث عن مشاركته في أبو نسب
كما تحدث الشحات مبروك عن ترشيحه للمشاركة في فيلم أبو نسب في ثاني تعاون يجمعه بالفنان محمد إمام بعد فيلم عمهم، قائلًا: رامي إمام، شاف الكيميا بيني وبين محمد إمام فأصر أني أكون موجود في أبو نسب، وأبو نسب غير عمهم قماشة تانية خالص، والزعيم الصغير محمد إمام عامل شخصية أنا اتفاجئت بيها، وضحكت لما شفته في اللوكشين لقيت واحد تاني خالص تخين وعامل فيها أبو نسب، قلت له عملت كده إزاي قال لي تعبت عقبال ما أوصل للشكل والشخصية.
وأضاف: كواليس الفيلم مستمتع به جدا، لأن الموضوع حلو جدا وفيه ضحك وأكشن ومطاردات والكوميديا حقيقية مش مفتلعة، وأنا لما شفته ضحكت، وقلت لما رامي إمام شغلني معاه في عوالم خفية ورشحني تاني دلوقتي يبقى أنا ممثل كويس.
اتظلمت بسبب حصري في أدوار الشر
وأشار الشحات مبروك إلى أنه يشعر بالظلم بسبب حصره منذ بداية عمله في التمثيل في أدوار الأكشن وعدم اكتشاف موهبته الحقيقية في التمثيل، قائلًا: اتظلمت أوي والله العظيم، أنا لعبت كمال أجسام وخدت بطولات العالم عشان أبقى ممثل مش عشان أضرب، ولكن شكلي وظروفي وعضلاتي حطتني في الحتة ديه، ولو رجعنا لأي مشهد في أي عمل هنلاقي فيّا حتة تمثيل.
في سياق آخر، قال الشحات مبروك عن رأيه في مواصلة تقديم الأعمال الفنية رغم ما يمر به أهل غزة: كان في حرب أوكرانيا وروسيا وقبلهم كورونا والعالم كله بيخبط في بعضه، ما ينفعش نقف ونضلم ونبوز ونبكي ونسيب أولادنا، لأ لازم نعيش وما نتعطلش لأن الآخرين بيعطلونا.
