عماد رشاد: عدى عليا سنين ما كنتش بلاقي شغل.. والمقابل الحقيقي من الفن هو المتعة
تحدث الفنان عماد رشاد عن مهنة الفن، مشيرًا إلى أنه مر عليه سنوات كثيرة كان يمكث في المنزل دون عمل، مؤكدًا أنه يحب عمله والمقابل الحقيقي الذي يحصل عليه من الفن هو المتعة.
وقال عماد رشاد في لقائه مع القاهرة 24: حصل كتير أني قعدت في البيت ما يتعرضش عليا شغل، وكان في ظاهرة غريبة لازمتني فترة لما أقدم عمل كويس أقعد بعدها سنة، وأنا شرحتها لنفسي، وقلت يمكن لو عملت عمل كويس المنتجين بيفتكروا أني هزود أجري.
وأضاف عماد رشاد: المجال بتاعنا الفنان فيه لازم يكون فيه حريص جدًا، لأن ممكن تقعد سنة ما يجيش شغل، أو يجي شغل ما يستحقش، وإحنا بنعمل مجهود وشغلتنا صعبة جسمانيا ونفسيا وعصبيا، وساعات بنكون في شغل متصل 20 ساعة في اليوم و18 ساعة.
من نعم ربنا أني بحب مهنتي أوي
وأكمل رشاد: من نعم ربنا أني بحب مهنتي أوي وبستمتع أني بشتغل، والحمد لله في واحد بيشتغل علشان مقابل مادي، لكن أنا المقابل الحقيقي اللي باخده من التمثيل متعتي، زي الرسام بيكون مستمتع بالفرشاة في ايده، ودي نعمة من عند ربنا.
وواصل عماد رشاد: أي شيء فيه إبداع أو فن، ما ينفعش أقول كان لازم كنت أكون أحسن من كده أو أغلى أو أشهر، مفيش حاجة اسمها كده في شغل الإبداع، لأني مش طبيب اللي بيجي له ميت أصحيه، الفنان مش طبيب شاطر يروح له مريض ويشفيه، الإبداع هو أي شيء بيتعامل مع أحاسيس الناس فيه اللي يرفض واللي يقبل، وفيه أهم من ده كله النصيب والرزق بتاع ربنا، والرضا مهم جدًا بيخلي أي حد يستمتع بشغله وباللي ربنا كاتبه.
