سو طفلة مسلسل الكبير تسترجع كواليس مشاركتها بالعمل: كنت مبهورة بـ أحمد مكي.. ودنيا سمير غانم ساعدتني
استعادت الفنانة ليلة عدنان كواليس مشاركتها في مسلسل الكبير أوي الجزء الثاني، والذي حققت من خلاله شهرة كبيرة بدور الطفلة سو، إلى جانب حديثها عن تعاونها مع أحمد مكي ودنيا سمير غانم.
وقالت ليلة عدنان خلال لقائها وزوجها الفنان عمرو أسامة في القاهرة 24: لما روحت كاستينج مسلسل الكبير أوي فوجئت أن كل البنات كبار وأنا كنت وقتها أصغر واحدة، وقلت لماما يلا نروح عشان عندي بكره امتحان وكده كده مش هتقبل، فسألنا مساعدة المخرج قالت لنا المخرج أحمد الجندي مش بيفكر في السن على قد ما بيهتم بالموهبة، واتصدمت لما عرفت أنهم قبلوني.
ليلة عدنان تستيعد ذكريات تعاونها مع أحمد مكي
وعن كواليس التعاون مع أحمد مكي قالت: لما شفت مكي كنت مبهورة وكنت خايفة في الأول لكن هو كسر الخوف عندي وكان دايمًا بيهزر معايا وقبل المشهد كنا بنتكلم ولو فيه جملة تقيله معايا مش هعرف أحفظها وممكن أبوظ المشهد بسببها يقول لي شيليها وحطي حاجة من عندك، وكان لذيذ وكلهم كانوا متفهمين معايا جدا وما كانوش مخوفني.
وعن التعاون مع دنيا سمير غانم والمشهد الذي جمعهما قالت: المشهد ده لما قرأته قلت له مش هينفع اشتمها، خاصة أن هي كيوت وطيبة وقلت لهم اشتمها ليه وما كنتش فاهمة التمثيل أوي، والمخرج قال لي هجيب لك دنيا دلوقتي واتكلموا مع بعض وهتحفظوا مع بعض وما يهمكيش ولما جت قالت لي اشتميني وقولي يا بقرة، وأنا من جوايا بقول يا جماعة عيب.
وأكملت: حبيت التمثيل من وأنا صغيرة ومش حاسة إن الموضوع صعب أو مخيف، والناس بتقول عليا شاطرة، ولكن كل ما أشارك في عمل بحس إني كنت ممكن أكون أفضل من كده.
وعن تقديمها دور مدمنة في مسلسل بلا دليل قالت: قبل الدور كان نفسي اطلع من حتة التناكة أو دور البنت الكيوت والحلوة اللي قاعدة في فيلا ولما اتعرض عليا الدور عجبتني الفكرة، خاصة أنه حاجة جديدة عليا وكنت حابة أتحدى نفسي وأعمله جدا وكنت متحمسة.
وعن التعليقات التي تتلقاها قالت: مفيش حد بيزعلني لكن كلهم بيتفاجئوا إني كبرت، وبيقولوا كانت شاطرة وهي بتمثل وأروبة وهي صغيرة، وأنا على طبيعتي مش بتصنع وأعمل رقيقة وكيوت.
ومن ناحيته، كشف عمرو أسامة إمكانية طلبه من ليلة ترك الفن قائلًا: ده مجالها وليلة شاطرة وبتعرف تختار الكويس من الوحش والناس اللي شغالة معاها، وشايف إنها مش واخدة حقها لسه.
وعن نصائحه لها قال: مش مقتنع بفكرة إني أكون مشرف اجتماعي، وإحنا صغيرين طبيعي هنعمل حاجات غلط وأنا في شغلي شفت حاجات كتير والتجارب مهمة.
