ليلة عدنان طفلة مسلسل الكبير وزوجها يتحدثان عن قصة حبهما: مش عيب إننا نتجوز واحنا صغيرين
تحدثت الفنانة ليلة عدنان، وزوجها الفنان عمرو أسامة، عن قصة حبهما، وذلك خلال لقائهما في القاهرة 24، بعد زواجهما منذ ثلاثة أشهر.
وقالت ليلة عدنان: كنا مع بعض في المدرسة، وكنت مشاركة في مسلسل الكبير أوي، فكان بيرخم عليا، وكلهم في المدرسة كانوا بيرخموا عليا علشان كانوا شايفني رخمة وأنا كنت لمضة ومش بسيب حقي، لكن عمري ما عشت في الدور ولا كنت تنكة وساعات بنسى إني ممثلة، وعمري ما ركزت في الموضوع ده.
من ناحيته، قال عمرو أسامة: أنا أكبر منها بخمس سنين والمدرسة اللي كنا فيها مقسومة نصين وكنت لما بشوفها بهزر وأرخم عليها، وهي كان دمها خفيف جدًا، ودي من الحاجات الغريبة لأن معظم الناس بيقولوا أن اللي شكله حلو دمه تقيل.
وأضاف: أنا اعترفت لها بحبي ليها الأول، لكني مش من الأشخاص اللي بقول الحاجة مباشرة، ولكن الموضوع جه بالتدريج وكنت بقول لها ما تخرجيش من غيري وبتخرجي مع مين وأسئلة من النوعية دي.
وعن إقناعه بالزواج وهي بسن صغير قال: ده مش عيب، أنا عندي صحابي أصغر مني متجوزين، وهي عندها صحابها أصغر منها متجوزين، وإحنا نعرف بعض بقالنا عشر سنين.
ليلة عدنان: ما كنتش شايفة عمرو مناسب ليا لأنه كان عنده صحاب بنات
وعن الانطباع الذي أخذه كل شخص عن الآخر في البداية قالت ليلة: أنا مكنتش شايفة أنه مناسب، لأنه كان ليه صحاب بنات كتير وبيخرجوا، وأنا كنت من التمرين للتصوير للبيت للنادي، وهو كان بيخرج كتير.
عمرو أسامة: كنت متمسك بيها
من ناحيته قال عمرو: من أول ما شفتها مع الوقت كنت شايفها طيبة وكويسة وكنت متمسك بيها وكنت شايف أنها أنسب واحدة ليا، ومن وقت الخطوبة لحد دلوقتي الموضوع اختلف وبقيت في حتة تانية لأني ما كنتش بدي اهتمام للشغل وهي بتشجعني في الشغل ومعايا في قرارات وحاجات كتير وشجعتني أنجح في شغلي وحياتي الشخصية وغيرت تفكيري.
