خالد عليش: قفلت الفرق اللي في سناني عشان أبعد عن الكوميدي.. وماتمش استغلالي كممثل | فيديو
قال المذيع والفنان خالد عليش، إنه كان يفضل في فترة من الفترات الإذاعة عن التمثيل، وأعطى لها وقته كله، الأمر الذي جعله يرفض أعمالًا كثيرة جيدة، مشيرًا إلى أن الفترة الحالية يحاول أن يعود للتمثيل بشكل مختلف ويتمنى أن يبتعد عن الكوميدي.
خالد عليش: عندي طاقة كبيرة كممثل لسه ما تمش استغلالها
وقال خالد عليش خلال ندوة تكريمه بالقاهرة 24: بشوف إني ما زلت لم أقدم شيئًا في التمثيل، وعندي طاقة كبيرة كممثل لسه ما تمش استغلالها، وأتمنى ما أمثلش كوميدي وبيتعرض عليا أدوار كوميدية كتيرة وبعتذر عنها لإني مش عاوز أكون كوميدي، وحصلت في الجامعة على جائزة أحسن ممثل عن دور تراجيدي، وعلشان كده عملت سناني وركبت تقويم لو هي دي اللي بتضحك، وشايف إني لسه معنديش مسيرة في التمثيل.
وأضاف خالد عليش: صاحب بالين كداب، وأنا مش بقول إنها غلطة ولكني فضلت الإذاعة في فترة على حاجات كتير ووقتها اتعرض عليا أدوار كتير وما اعتذرتش عنها لأنها كانت عجباني لكني معرفتش أوفق، لحد ما الناس بقى عندها حالة يأس مني، وقالوا ده مش فاضي لينا ونجم في حتته.
وتابع خالد عليش: بحاول أرجع مرة تانية واظبط مواعيد برنامجي، خاصة إني وصلت للي عاوزه في الإذاعة، وبقيت معروف في الوطن العربي وعامل مسيرة في الراديو، ومش غرور مني، لكني عاوز أبدأ غي التمثيل واخد مساحة وأعمل مسيرة.
وأكمل خالد عليش: أنا عمري ما خدت ورش تمثيل، ولما يكون عندي دور واضح ومش كوميدي هبدأ آخد ورشة تمثيل على الدور، وعاوز اشتغل على نفسي أكتر في الدور، وحاليًا بقى فيه مدرب مع الفنان للأدوار.
